Gjykata e Apelit ka aprovuar pjesërisht ankesën e Prokurorisë Themelore në Prizren, duke ia rritur dënimin nga 7 vjet e 6 muaj në 10 vjet burgim të akuzuarit B.G., i cili u shpall fajtor për vrasje të rëndë në tentativë ndaj bashkëshortes dhe vajzës së tij të mitur.

Sipas Apelit, dënimi i mëparshëm i shkallës së parë nuk ishte në përputhje me shkallën e rrezikshmërisë shoqërore dhe pasojat e shkaktuara.

Pas shqyrtimit të ankesës, Apeli ka konstatuar se gjykata e shkallës së parë e kishte vërtetuar drejt dhe plotësisht gjendjen faktike të rastit, por nuk u kishte dhënë peshën e duhur rrethanave gjatë përcaktimit të lartësisë së dënimit.

Në vendimin e ri, të akuzuarit do t’i llogaritet edhe koha e kaluar në paraburgim.

Burimi: Insajderi