Muzeu Metropolitan i Artit në New York ka zbuluar temën e re të ekspozitës së Costume Institute për pranverën e vitit 2027, pasi retrospektiva e planifikuar e stilistit John Galliano u anulua pas polemikave të shkaktuara nga deklaratat e tij të mëparshme antisemite dhe raciste.

Ekspozita e re, e titulluar “extraORDINARY: Fashion and the Poetics of the Everyday” (Moda dhe poetika e përditshmërisë), do të hapet në kuadër të Met Gala 2027, eventit tradicional që mbahet të hënën e parë të muajit maj.

Sipas muzeut, ekspozita do të sjellë një qasje ndryshe ndaj modës, duke shqyrtuar mënyrën se si stilistët transformojnë veshjet e zakonshme, objektet e përditshme dhe materialet e njohura në krijime artistike përmes mjeshtërisë, konstruksionit, eksperimentimit me materiale dhe ideve kreative.

Foto: AP

Përgatitja e ekspozitës i është besuar Andrew Bolton, kuratorit kryesor të Costume Institute, i cili është dashur të zhvillojë një koncept të ri në një kohë relativisht të shkurtër, pas vendimit për anulimin e retrospektivës së Gallianos.

Ky vendim erdhi pas presionit nga donatorët, zyrtarët e qytetit dhe komuniteti hebre, për shkak të deklaratave të mëparshme antisemite dhe raciste të stilistit.

Bolton ka pranuar se anulimi i ekspozitës fillestare e kishte gjetur pa një alternativë të gatshme.

“Nuk kisha një plan B, të jem i sinqertë”, është shprehur ai.

Sipas tij, ideja për temën e re lindi nga puna e mëhershme për ekspozitën “Costume Art” dhe reflektimet mbi mënyrën se si njerëzit e përjetojnë veshjen në jetën e përditshme, përmes përdorimit, kujtimeve dhe lëvizjes.

Foto: Getty Images

“Veshjet e përditshme mbartin një sasi të jashtëzakonshme kuptimesh”, ka deklaruar Bolton.

Ndër zërat më të fuqishëm kundër ekspozitës së Gallianos ishte edhe Julie Menin, kryetarja e Këshillit Bashkiak të New Yorkut, e cila është vajza e një të mbijetuari të Holokaustit.

Ajo e kishte cilësuar anulimin si vendimin e duhur, duke thënë se dëmi dhe dhimbja që kishte shkaktuar kjo situatë ishin të papranueshme.

Galliano, i cili më parë ka qenë drejtor kreativ i shtëpisë së modës Christian Dior, u shkarkua nga pozita në vitin 2011, pasi deklaratat e tij raciste dhe antisemite të viteve 2010 dhe 2011 u bënë publike.

Më pas, ai u shpall fajtor në një proces gjyqësor në Francë lidhur me deklaratat antisemite.

Pas anulimit të ekspozitës, stilisti pranoi përgjegjësinë për fjalët e tij dhe shprehu keqardhje për lëndimin që u kishte shkaktuar komuniteteve hebreje dhe aziatike.

Foto: Getty Images

“Vazhdoj të mbaj përgjegjësi të plotë për dhimbjen që kanë shkaktuar fjalët e mia në të kaluarën, veçanërisht për lëndimin që u kam shkaktuar komunitetit hebre dhe atij aziatik, për të cilën më vjen thellësisht keq”, deklaroi ai.

Ndërkohë, tema e ekspozitës së re pritet të përcaktojë edhe kodin e veshjes për Met Gala 2027, emrat e nikoqirëve të mbrëmjes dhe detajet e tjera të eventit që do të mbahet më 3 maj do të bëhen të ditura në një fazë të mëvonshme. /Telegrafi/