Rusia dhe Ukraina kanë arritur marrëveshje në parim për një shkëmbim të ri dhe në shkallë të gjerë të të burgosurve të luftës, gjatë bisedimeve trepalëshe në Abu Dhabi, ku morën pjesë edhe përfaqësuesit e Shteteve të Bashkuara të Amerikës.
Lajmin e bëri të ditur të mërkurën kreu i delegacionit rus, Vladimir Medinsky, i cili tha se parametrat konkretë të shkëmbimit do të bëhen publikë në të ardhmen e afërt.
Sipas Medinskyt, tema kryesore e negociatave ishte arkitektura e ardhshme e sigurisë në Evropë pas përfundimit të luftës në Ukrainë.
“Bota ka nevojë për një sistem sigurie të ri, modern dhe të përditësuar, i cili do të jetë i drejtë dhe nuk do të funksionojë në dëm të asnjë vendi individual. Ne do të punojmë për këtë”, tha ai pas përfundimit të ditës së dytë të negociatave.
Kreu i delegacionit rus argumentoi se lufta në Ukrainë ka dëshmuar se sistemi aktual i sigurisë në Evropë nuk po funksionon në mënyrë efektive, prandaj, sipas tij, është i nevojshëm krijimi i një kuadri të ri për periudhën e pasluftës.
Sipas palës ruse, diskutimet u përqendruan edhe në gjetjen e mekanizmave që do të parandalonin kërcënimet e ardhshme dhe do të forconin stabilitetin rajonal.
Medinsky bëri të ditur se hollësitë e negociatave nuk do të publikohen deri në arritjen e marrëveshjeve përfundimtare. Ai e përshkroi atmosferën e takimeve si miqësore, duke vlerësuar rolin aktiv të përfaqësuesve amerikanë.
Një pjesë e rëndësishme e diskutimeve iu kushtua edhe çështjeve humanitare. Medinsky konfirmoi se Moska dhe Kievi kanë rënë dakord në parim për një shkëmbim të ri dhe në shkallë të gjerë të të burgosurve të luftës.
“Ne kemi rënë dakord në parim për një shkëmbim të ri në shkallë të gjerë të të burgosurve të luftës, parametrat specifikë të të cilit do të shpallen në të ardhmen e afërt”, u tha Medinsky gazetarëve pas bisedimeve trepalëshe.
Megjithatë, deri më tani nuk është bërë e ditur se sa të burgosur do të përfshihen në këtë marrëveshje dhe kur pritet të zbatohet shkëmbimi.
Ndërkaq, gjatë ditës së parë të negociatave, presidenti ukrainas, Volodymyr Zelenskyy, kishte bërë të ditur se po shqyrtoheshin dy mundësi për shkëmbimin: njëra me nga 1 mijë të burgosur për secilën palë dhe tjetra edhe më e madhe, me nga 1 mijë e 500 të burgosur nga secili vend.
Sinjali – aty ku e vërteta flet para lajmit!
Burimi: Sinjali
