Rasti i dyshuar i cenimit të konfidencialitetit bankar të kryetarit të Prishtinës, Përparim Rama, merr një dimension të ri. Albion Ferati, ish-punonjësi i Raiffeisen Bank, emri i të cilit është lidhur me dyshimet për qasje të paautorizuar në llogarinë dhe transaksionet bankare të Ramës, aktualisht mban një pozitë drejtuese në një tjetër institucion financiar në Kosovë. Ferati tani është Head of Accounting në TEB Bank.

Ky informacion vjen në kohën kur Prokuroria Themelore në Prishtinë ka autorizuar Policinë e Kosovës të ndërmarrë veprime parahetimore për zbardhjen e dyshimeve lidhur me qasjen dhe shpërndarjen e paautorizuar të të dhënave bankare të kryetarit të kryeqytetit.

Sipas informacioneve të Sinjalit, Albion Ferati aktualisht ushtron funksionin Head of Accounting në TEB Bank, një pozitë që lidhet me përgjegjësi në fushën e kontabilitetit dhe raportimit financiar.

Ky zhvillim merr rëndësi të veçantë për shkak se emri i Feratit është përmendur publikisht në lidhje me një rast që ka ngritur pikëpyetje për respektimin e konfidencialitetit bankar dhe mbrojtjen e të dhënave personale të klientëve.

Çfarë dihet për rastin në Raiffeisen Bank?

Rasti u bë publik pasi Komuna e Prishtinës njoftoi se kryetari Përparim Rama kishte paraqitur ankesë lidhur me qasjen e dyshuar të paautorizuar në llogarinë e tij bankare.

Sipas Komunës, një punonjës i Raiffeisen Bank kishte pasur qasje pa autorizim në të dhënat e Ramës dhe kishte shpërndarë informacione mbi gjendjen dhe transaksionet e tij financiare.

Komuna bëri të ditur gjithashtu se banka e kishte informuar Ramën për identifikimin dhe largimin nga puna të punonjësit përgjegjës.

Raiffeisen Bank ka konfirmuar se e ka trajtuar ankesën, ka zhvilluar procedurat e brendshme dhe ka njoftuar autoritetet kompetente, por nuk ka bërë publike rezultatet e plota të shqyrtimit të brendshëm dhe as identitetin e punonjësit.

Ndërkohë, emri i Albion Feratit është raportuar edhe nga media të tjera, duke iu referuar burimeve policore.

Pozita aktuale në TEB Bank ngre pyetje të reja

Pavarësisht dyshimeve të bëra publike për rastin në Raiffeisen Bank, Ferati aktualisht mban pozitën Head of Accounting në TEB Bank.

Kjo rrethanë ngre pyetje me interes publik për procedurat e verifikimit profesional, vlerësimin e integritetit dhe standardet e konfidencialitetit që zbatohen për personat e angazhuar në pozita me përgjegjësi brenda institucioneve bankare.

Megjithatë, vetëm ekzistenca e një hetimi apo dyshimi nuk përbën provë të përgjegjësisë penale dhe as nuk nënkupton automatikisht papërshtatshmëri për ushtrimin e një funksioni profesional.

Deri më tani, nuk ka informacion të konfirmuar se TEB Bank ka konstatuar ndonjë shkelje nga Ferati gjatë ushtrimit të detyrës së tij në këtë institucion.

Prokuroria ka autorizuar veprime parahetimore

Prokuroria Themelore në Prishtinë ka konfirmuar se rasti është pranuar për trajtim dhe se Policia është autorizuar të ndërmarrë veprimet e nevojshme parahetimore.

Hetimet pritet të sqarojnë nëse ka pasur qasje dhe shpërndarje të paautorizuar të të dhënave bankare, cilët persona kanë qenë të përfshirë dhe nëse ekzistojnë elemente të përgjegjësisë penale.

Rasti, përtej përfshirjes së një zyrtari publik, shtron një pyetje me rëndësi për secilin klient bankar: sa të mbrojtura janë të dhënat financiare dhe cilët mekanizma garantojnë që qasja në to të bëhet vetëm për qëllime të ligjshme dhe nga persona të autorizuar?

Burimi: Insajderi