E ardhmja e JJ Gabrielit vazhdon të jetë një nga temat kryesore në afatin kalimtar të transferimeve, teksa po afrohet hapja e merkatos së janarit.
Talenti anglez ka qenë në qendër të vëmendjes për një kohë të gjatë, pasi raportohet se ka dorëzuar një kërkesë për largim nga Manchester United.
I konsideruar si një nga talentet më të mëdha që ka dalë nga akademia e Unitedit në vitet e fundit, JJ Gabrieli është lidhur kryesisht me një transferim te dy gjigantët spanjollë, Real Madrid dhe Barcelona.
Një raportim i fundit nga gazetari Alvaro Esteban ka sjellë një përditësim të ri për të ardhmen e JJ Gabrielit.
Duket se trajneri i Real Madridit, Jose Mourinho, ka vendosur të përfshihet personalisht në përpjekjet e klubit për ta transferuar talentin e akademisë së Manchester Unitedit, në një tentim për ta bindur atë që të kalojë në Santiago Bernabeu.
Esteban shton se Mourinho ka biseduar me përfaqësuesit e JJ Gabrielit rreth mundësisë së një transferimi te Real Madridi në të ardhmen e afërt.
Kjo vjen pas raportimeve të fundit, sipas të cilave Real Madridi pritet që së shpejti ta finalizojë marrëveshjen për transferimin e talentit të Manchester Unitedit.
Është e qartë se JJ Gabrieli nuk do të bëhet menjëherë pjesë e ekipit të parë të Real Madridit pas transferimit të mundshëm.
Në moshën 16-vjeçare, ai ende duhet të kalojë nëpër departamentin e të rinjve, i cili tashmë është i mbushur me talente të reja.
Por një nga arsyet pse vetë futbollisti preferon kalimin në Santiago Bernabeu është oferta e paraqitur nga Real Madridi.
Klubi u ka dhënë hapësirë një numri të madh të talenteve të akademisë në vitet e fundit dhe duket se JJ Gabrieli është më se i gatshëm të luftojë për vendin e tij në skuadër, duke e fituar atë përmes punës së palodhshme.
Fakti që vetë Mourinho ka vendosur të përfshihet në këtë çështje duhet të shërbejë si një garanci shtesë për të riun anglez, teksa ai synon ta bëjë hapin e radhës në karrierën e tij.
Plani është që ai t’i bashkohet menjëherë skuadrës së Castillas, ndërsa shumë njerëz brenda klubit besojnë se debutimi i tij me ekipin e parë nuk do të jetë larg pas kësaj.
Burimi: Insajderi
