Një muze i pazakontë në Amsterdam po tërheq vëmendjen me një koncept krejt ndryshe nga ekspozitat tradicionale: kafshët e ruajtura paraqiten sikur janë të lira në natyrë, ndërsa vizitorët lëvizin nëpër hapësira të rrethuara me kafaze metalike.

Muzeu i ri, i quajtur Art Zoo, është krijuar nga artistët holandezë Jaap Sinke dhe Ferry van Tongeren, të cilët kanë shndërruar një ndërtesë historike të shekullit XVII në një hapësirë artistike të pazakontë.

Ekspozita përmban qindra kafshë të ruajtura, skelete dhe objekte të ndryshme natyrore, të vendosura në skena dramatike që ndërthurin artin, natyrën dhe imagjinatën.

Një nga objektet më mbresëlënëse është një krokodil gjigant i varur nga tavani, ndërsa në dhoma të tjera vizitorët mund të shohin një gatopard të vendosur në një pozicion të pazakontë, një gaforre gjigante merimangë dhe skelete të kafshëve parahistorike.

Artistët janë frymëzuar nga të ashtuquajturat “wunderkammer”, koleksionet e rralla të objekteve natyrore dhe kurioziteteve që aristokratët evropianë mblidhnin gjatë shekujve XVI dhe XVII.

Sipas krijuesve, qëllimi nuk është të imitojnë një muze tradicional të historisë natyrore, por të tregojnë histori përmes kafshëve dhe mënyrës se si ato paraqiten në hapësirë.

Artistët theksojnë se ekzemplarët e ekspozuar nuk janë marrë nga natyra e egër, por kanë ardhur kryesisht nga kopshte zoologjike, ku kafshët kanë ngordhur nga shkaqe natyrore.

Me këtë koncept, Art Zoo synon të sfidojë mënyrën tradicionale se si njerëzit e përjetojnë artin dhe natyrën, duke e shndërruar të gjithë ndërtesën në një vepër artistike.

Burimi: Dukagjini