Komisionerja e Bashkimit Evropian për Zgjerim, Marta Kos, ka thënë se amendamentet e propozuara për Ligjin për Dhomat e Specializuara mund të rrezikojnë përparimin e Kosovës në reforma.

Ajo ka bërë të ditur se Bashkimi Evropian tashmë është në dialog me Qeverinë e Kosovës lidhur me këto amendamente.

Duke folur për reformat në vend, Kos ka shprehur shpresën se me formimin e Qeverisë së re, Kosova do të ketë mundësi të ecë përpara.

“Me qeverinë e re, shpresoj që shteti ta ketë mundësinë të ecë përpara. Amendamentet në Ligjin për Specialen rrezikojnë ta minojnë çdo përparim, por tashmë jemi në dialog me Qeverinë e Kosovës sa u përket këtyre amendamenteve”, ka deklaruar ajo.

Sa i përket rrugës së Kosovës drejt Bashkimit Evropian, Kos ka thënë se hapi i radhës është që 27 shtetet anëtare të pajtohen për t’i kërkuar Komisionit Evropian përgatitjen e opinionit për aplikimin e Kosovës për anëtarësim.

Ajo ka theksuar se Komisioni Evropian është i gatshëm ta përgatisë këtë opinion, por për këtë nevojitet pajtimi i shteteve anëtare.

“Jemi të gatshëm ta bëjmë këtë. Por, për t’i bindur shtetet anëtare, Kosovës i duhen institucione të qëndrueshme, siç i ka tash, dhe përparim në reforma. Sa më i madh të jetë përparimi në reforma, aq më i fuqishëm do të jetë rasti i Kosovës për të ecur përpara”, ka thënë Kos.

Burimi: Dukagjini