Tesla ka marrë miratim të përkohshëm për të përdorur sistemin e saj të Asistuar të Drejtimit (TAD) në rrugët finlandeze pasi bëri ndryshime në teknologji.

Agjencia e Transportit dhe Komunikacionit e Finlandës (Traficom) njoftoi vendimin të mërkurën, duke thënë se Tesla “mund të fillojë menjëherë t’ua ofrojë sistemin klientëve të saj në Finlandë”.

Teknologjia u lejon makinave të drejtojnë, përshpejtojnë dhe frenojnë automatikisht, megjithëse shoferët duhet të mbajnë kontrollin dhe të mbikëqyrin funksionimin e saj.

Sistemi u riemërua Tesla Assisted Driving nga Full Self-Driving (FSD) Supervised për të përshkruar më mirë se çfarë bën.

Sipas Specialistit të Lartë të Traficom, Jukka Juhola, emri i ri pasqyron “natyrën e vërtetë të sistemit” dhe dallon teknologjinë e asistencës së shoferit nga automjetet plotësisht autonome.

Miratimi vjen ndërsa Evropa vazhdon të përballet me sfida rregullatore mbi teknologjinë e automatizuar të drejtimit.

BE-ja është në një bllokim mbi rregullat që do të lejonin makinat pa shofer, duke i shtyrë shumë firma të ecin përpara në nivel rajonal dhe kombëtar.

Megjithatë, rregullat e ndryshme kombëtare e kanë komplikuar lansimin e automjeteve plotësisht pa shofer, me kompanitë që duhet të kërkojnë miratim nga autoritetet lokale dhe rajonale përveç atyre kombëtare.

Në Evropë, Holanda autorizoi përdorimin e sistemit në prill, e ndjekur nga Estonia, Belgjika, Lituania dhe Danimarka.

Tesla tashmë e ofron teknologjinë në Shtetet e Bashkuara, Australi, Kanada dhe Korenë e Jugut. /Telegrafi/