Niniq njoftoi se kishte dorëzuar kallëzim penal kundër drejtorit të Agjencisë për Informim të Sigurisë (BIA), Vladimir Orliq, dhe shtatë zyrtarëve të tjerë të lartë të agjencisë. Të akuzuarit janë kryesisht nga Qendra Rajonale e 4-të në Kragujevc, si dhe nga qendrat territoriale në Smederevo dhe Paraçin.

Sipas kallëzimit, udhëheqja e BIA-s u ka vendosur detyrim pune punonjësve të agjencisë që të mbledhin firma dhe vota për SNS-në në formularë të partisë. Ninić pretendon se kjo është bërë duke keqpërdorur pozitën zyrtare dhe duke vepruar si grup i organizuar kriminal. Ai ka bashkangjitur edhe fotografinë e kallëzimit me vulën e TOK-ut dhe datën e pranimit.

Në postimin e tij, Niniq bëri thirrje që të gjithë punonjësit e BIA-s që kanë prova ose informacione për këtë sistem t’i dorëzojnë ato si plotësim të kallëzimit.

Mediat si N1, 021.rs, Bez Cenzure dhe Telegrafi e kanë mbuluar gjerësisht këtë veprim.

Një ditë më parë, më 1 nëntor, Niniq kishte paraqitur një kallëzim tjetër, edhe më të gjerë. Ai akuzoi 63 persona, përfshirë ministrin e Drejtësisë Nenad Vujić dhe drejtorin e Administratës për Ekzekutimin e Sanksioneve Penale, se kanë organizuar sistemin e mbledhjes së votave kapilare brenda burgjeve serbe.

Sipas tij, përmes këtij sistemi janë mbledhur mbi 38 mijë vota. Niniq pretendon se ekzistonin grupe në Viber me emrin “Shtabi”, ku u jepeshin kuota dhe detyra drejtuesve të burgjeve, dhe se punonjësit e burgjeve ishin të detyruar të raportonin rezultatet.

Ai ka publikuar dokumente, tabela dhe pjesë të komunikimeve që, sipas tij, dëshmojnë se si funksiononte ky mekanizëm.

Konteksti më i gjerë

Niniq ka njoftuar prej disa ditësh se do të paraqiste kallëzime kundër institucioneve shtetërore që, sipas tij, janë politizuar dhe janë përdorur për qëllime partiake. Ai flet për “sistem kapilar” që përfshin tabela të firmosura, koordinatorë, komunikime në Viber, raporte pune, makina shërbimi dhe foto për të dëshmuar besnikërinë.

Deri më tani, as Prokuroria dhe as BIA apo Ministria e Drejtësisë nuk kanë dhënë reagime zyrtare të detajuara ndaj këtyre akuzave.

Ninić, i cili prej vitesh është i njohur si avokat kritik ndaj pushtetit, ka thënë se do të vazhdojë të dorëzojë materiale shtesë sa herë që merr prova të reja.

Burimi: RTKLive