Një rast shqetësues është zbuluar në shkollën “Zenel Hajdini” në Prishtinë, ku një vajzë 14-vjeçare është gjetur me thikë. Pas ndërhyrjes së Policisë, e mitura ka rrëfyer se prej kohësh përballej me dhunë fizike dhe psikologjike nga vëllai i saj dhe se nuk ndihej e sigurt të kthehej në shtëpi, mëson Gazeta Sinjali.
Rasti është raportuar të premten, më 13 nëntor, kur drejtoria e shkollës ka njoftuar Policinë se një nxënëse kishte me vete një armë të ftohtë.
Njësitë policore kanë dalë menjëherë në shkollë, ku kanë takuar vajzën, prindin e saj dhe drejtoreshën e institucionit arsimor.
Thika është sekuestruar nga Policia, ndërsa e mitura është intervistuar nga hetuesit e dhunës në familje, në prani të përfaqësuesit të Qendrës për Punë Sociale.
Gjatë intervistimit, vajza me inicialet E.Sh.,rreth 14-vjeçare, ka deklaruar se vëllai i saj, E.Sh., rreth 19-vjeçar, e kishte sulmuar, goditur dhe ofenduar vazhdimisht.
Sipas deklarimit të saj, dhuna e përsëritur kishte bërë që ajo të mos ndihej e sigurt në shtëpinë e familjes.
Pas marrjes së deklaratës, Policia ka intervistuar edhe vëllain e dyshuar.
Për rastin është njoftuar Prokuroria kompetente për dhunën në familje dhe, në koordinim me Qendrën për Punë Sociale, është vendosur që 14-vjeçarja të strehohet në një institucion mbrojtës.
Ndërkohë, i dyshuari është liruar në procedurë të rregullt.
Rasti po trajtohet për veprën penale “Dhuna në familje”.
Sinjali – aty ku e vërteta flet para lajmit!
Burimi: Sinjali
