Përshpejtimi i çmimeve në Prill çoi inflacionin në eurozonë në 3%, nga 2.6% që ishte në Mars. kjo rezulton të jetë norma më e lartë që nga shtatori I vitit 2023 dhe dukshëm mbi objektvin e Bankës Qendrore Europiane prej 2%.
Rritjen më të fortë e kanë parë çmimet e energjisë që me bazë vjetore u zgjeruan me 10.8% muajin e kaluar, ndikuar nga lufta në Iran. Ndërsa konflikti në Lindjen e Mesme vijon ende, ndikimi duket se do të shtrihet më tej edhe në pjesë të tjera të ekonomisë.
Megjithatë, pavarësisht se presioni më i dukshëm ka ardhur nga çmimet e energjisë këtë periudhë, shërbimet mbeten nxitësi kryesor i inflacionit në Eurozonë.
Normat më të larta vjetore të inflacionit sipas Eurostat u regjistruan në Rumani me 9.5%, ndjekur nga Bullgaria dhe Kroacia. Ndërsa, Suedia, Danimarka dhe Çekia regjistruan nivelet më të ulëta vjetore të inflacionit në prill.
Ndërkohë, edhe aktiviteti ekonomik në eurozonë shënoi një tkurrje të ndjeshme në maj, më e shpejta në më shumë se dy vjet. Indeksi i përbërë i menaxherëve të Blerjes përpiluar nga agjencia Standard and Poor’s, ra në 48.8 përqind, shumë poshtë pritshmërive të ekonomistëve.
Kërkesa e përgjithshme u përkeqësua, ndërsa porositë e reja në të gjithë sektorin privat ranë me ritmin më të shpejtë në 18 muaj. Aktiviteti shërbimeve, nxitësi dominues i ekonomisë së eurozonës dhe një matës kyç i kërkesës së konsumatorit u tkurr këtë periudhë.
Edhe tregu i punës ka marrë një goditje këtë periudhë pasi kompanitë e eurozonës ulën numrin e punonjësve për të pestin muaj radhazi. Banka Qendrore Europiane ndërkohë i la normat e interesit të pandryshuara muajin e kaluar, por sinjalizoi se mund të rriten në qershor si një mënyrë për të mbajtur nën kontroll inflacionin.
The post Rritet inflacioni në eurozonë – Arrin në 3 përqind në prill, më i larti që prej 2023 appeared first on Gazeta Express.
