Në muajin që lamë pas u pensionua si gjyqtare, profesion që e kishte nisur si e re.
Por, për 11 vite ajo qëndroi në krye të Komisionit Qendror të Zgjedhjeve, pavarësisht sfidave e presionit, duke arritur ta bënte këtë institucion të besueshëm dhe shembull për organizim të zgjedhjeve.
Valdete Daka, ish kryetare e KQZ-së, në një rrëfim për dokumentarin Expose të Gazeta Blic, ka folur për punën e saj fillimisht si gjyqtare e më pas si kryetare e KQZ-së, vështirësitë, sfidat, presionet, paragjykimet si grua, shkarkimin, ofertat për të hyrë në garën për deputete dhe arsyet e refuzimit të saj.
Si 25 vjeçare kishte nisur punën si gjyqtare, mes sfidave e paragjykimeve si një grua e re, e vetmja në Gjykatën Komunale në Prizren.
Megjithatë, ajo ka arritur që t’u dalë ballë sfidave dhe t’i tejkalojë ato, pa e ndalur punën asnjëherë.
As sfidat e as presioni politik e medial nuk e kanë detyruar të bëjë kompromis për punën e pavarësinë e saj. Ka nisur e ka përfunduar karrierën si gjyqtare, pa u lëkundur në parimet e saj.
“Jam emëruar gjyqtare në vitin 1986, kohë shumë e largët prej tash, para 40 vitesh, kam qenë ndër gjyqtaret më të reja në Kosovë, vetëm 25 vjeçe dhe ka qenë për mua puna e parë, dhe praktikisht e kam punuar tërë jetën, kam punuar si gjyqtare dhe e kam përfunduar karrierën si gjyqtare. Ka pasur sfida në atë kohë, fillimisht si femër sepse kam qenë e vetmja gjyqtare në Gjykatën Komunale në Prizren, pastaj ndër të paktat në Gjykatën e Qarkut në Prizren por me kohë ndërroi ajo mendësi dhe nuk ekzistoi më si sfidë. Ka qenë sfidë koha kur kemi punuar në sistemin e kaluar dhe kur është dashur të ballafaqohemi me raste me prapavijë nacionaliste, ka qenë bukur e vështirë. Fatbardhësisht unë s’kam qenë pjesë e atyre vendimeve sepse kam punuar me të mitur, mandej me çështje civile dhe s’kam pasur fatin që të ballafaqohem me ato raste. Pastaj jemi larguar nga puna të gjithë gjyqtarët shqiptarë, kemi mbetur pa punë, një pjesë e vështirë e jetës, kur filluan krizat e paraluftës dhe më pas u ballafaquam edhe me luftën”, ka thënë ajo.
Krahasuar me sistemin gjyqësor aktual, Daka thotë se në atë kohë ka qenë tjetër sistem, tjetër shtet e tjera ligje.
“Po atëherë ka qenë komplet tjetër sistem, kemi jetuar në një shtet tjetër, një sistem komunist, tash është krejt diçka tjetër, kanë ndryshuar ligjet, ka ndryshuar qasja, mënyra se si gjyqtarët zgjidhen e punojnë, pak a shumë krejt ndryshe”, është shprehur Daka.
/Gazeta Blic/
