Në mbrëmjen gala të organizuar nga Këshilli për Marrëdhëniet Shqiptaro-Amerikane, kryeministri Edi Rama e nisi fjalën e tij me tone të ashpra për dënimin e bujshëm të ish-krerëve të Ushtrisë Çlirimtare të Kosovës. Veçanërisht, për privimin e lirisë së ish-Presidentit të Kosovës, Hashim Thaçi.
“Ai nuk është me ne sot këtu dhe ai nuk mund të jetë sot me ne këtu, sepse ky vend e tradhtoi! Joe Biden-i që e emërtoi George Washingtoni i Kosovës, e tradhtoi! Sepse edhe pse gjenerali Clark dhe disa miq të shkëlqyer amerikanë bënë më të mirën, ky vend nuk bëri më të mirën për Hashim Thaçin, George Washingtoni-n e Kosovës. Kjo s’më bën të ndihem mirë dhe dua ta ndaj.
Dua të ndalem këtu sepse nuk dua të them më shumë…
Askush nuk duhet të me keqkuptojë, kur them tradhtuar, e kam fjalën se ne jemi të gjithë shumë të vegjël. Edhe së bashku nuk jemi të mëdhenj, por ne kemi kremtuar e do të kremtojmë gjithmonë faktin se si shqiptarë jemi miq me më të mëdhenjtë e më të fortët, Shtetet e Bashkuara të Amerikës. Ndaj, ndihem i tradhtuar! Jam i sigurt që ky vend mund të kishte bërë më shumë. Së pari e mbi të gjitha, duke mos lejuar që kjo farsë të niste”, deklaroi Rama për Thaçin, të cilin thuajse çdo herë e ka quajtur vëlla.
“Shqipëria i përket Zotit dhe mikut”, tha Rama më tej, duke shtuar se nuk duhen fajësuar të huajt që investojnë në Shqipëri.
Numri një i kabinetit e cilësoi ndikimin e rrjeteve sociale dhe manipulimin e mendjeve të të rinjve si një nga sfidat më të mëdha me të cilat përballen sot shoqëritë, duke paralajmëruar për keqpërdorimin e lirisë së shprehjes dhe përhapjen e dezinformimit.
“Armiqtë nuk ka nevojë të na ndjekin me raketa, por duke u përzier me trurin e të rinjve tanë çdo orë përmes telefonit celular. Nëse Amendamenti i Parë ka për qëllim të lejojë çdo lloj mbeturine e plehre, ndjesë se po hani, nuk po jetojmë në civilizim, por barbari! Nuk bëjmë dot të njëjtën gjë me armiqtë tanë, ata kanë vënë mburojë për njerëzit e tyre. Ne nuk përzihemi dot me mendjen e fëmijëve kinezë, sepse janë të mbrojtur, nuk jam avokat për mbylljen e rrjeteve sociale, apo të ndikojmë te liria e shprehjes, por e vërteta nuk ka qenë kurrë më e abuzuar dhe konsumuar në emër të gënjeshtrës, manipulimit dhe të së keqes“, përfundoi Rama./Tv Klan
