Kryeministri i Shqipëria, Edi Rama ka zhvilluar një vizitë zyrtare në Estonia, ku mori mbështetjen e qartë të homologut estonez Kristen Michal për procesin e integrimit europian të Shqipërisë.
Gjatë konferencës së përbashkët për media, Michal theksoi se Estonia vazhdon të mbështesë zgjerimin e Bashkimi Evropian dhe rrugëtimin evropian të Shqipërisë, duke vlerësuar progresin e reformave të ndërmarra nga Tirana zyrtare.
“Estonia mbështet fort zgjerimin e BE-së dhe kemi mbështetur Shqipërinë në rrugëtimin e saj drejt Bashkimit Evropian. Vazhdoni të ecni përpara me reforma për të ardhmen e vendit dhe popullit tuaj. Nëse Shqipëria përmbush angazhimet e saj, edhe BE-ja do të bëjë të njëjtën gjë”, deklaroi Michal.
Kryeministri estonez vuri theksin edhe te bashkëpunimi ekonomik dhe teknologjik mes dy vendeve, duke përmendur fluturimet direkte si një mundësi të re për turizmin dhe biznesin.
Sipas tij, Shqipëria dhe Estonia kanë interesa të përbashkëta në fushën e transformimit dixhital dhe inteligjencës artificiale.
Ai tha se përvoja e Estonisë si një nga shtetet më të digjitalizuara në Evropë dëshmon se teknologjia mund të reduktojë burokracinë dhe të përmirësojë shërbimet publike. Michal përmendi gjithashtu nismën e re të Estonisë për inteligjencën artificiale (AI), duke e cilësuar atë si investim strategjik për ekonominë e së ardhmes.
“Pres me padurim të thellojmë bashkëpunimin për çështjet dixhitale dhe inteligjencën artificiale. Shqipëria ka një ministre për AI, ndaj Estonia duhet të ecë shpejt që t’ju arrijë”, tha ai me humor gjatë konferencës me Ramën.
Në përfundim, kryeministri estonez kujtoi se vitin e ardhshëm dy vendet shënojnë 25-vjetorin e marrëdhënieve diplomatike, duke shprehur bindjen se bashkëpunimi mes Tiranës dhe Tallinnit do të bëhet edhe më i fortë në vitet në vijim.
