Kolektivi për Mendim dhe Veprim Feminist ka mbajtur protestë solidarizuese para Ambasadës së Shqipërisë në Kosovë, në mbështetje të protestave kundër privatizimit të zonave bregdetare në Shqipëri.
Protestuesit kanë brohoritur me thirrje si “Rama e Berisha në burg” dhe “Toka është e popullit”, duke kundërshtuar projektet për investime turistike luksoze në zonat e mbrojtura të Zvërnecit dhe Ishullit të Sazanit.
Aktivistja Liridona Sijarina tha se protesta është organizuar për të shprehur solidaritet me qytetarët në Shqipëri që po kundërshtojnë, sipas saj, “zaptimin” e tokës publike nga kapitali privat.
“Sot, jemi mbledh këtu për me shpreh solidaritetin tonë me protestat në Shqipni, që janë tu u bo për me mbrojt tokën edhe natyrën në Zvërnec, Sazan e përtej. Javët e fundit, tashmë gjithë bota u njoftu për marrëveshjen ndërmjet Jared Kushner edhe Edi Ramës. Një marrëveshje kjo e cila synon me e zaptu tokën shqiptare e me ia dhanë pasanikëve. Pra, me e shndërrua një vend të tanë në një resort e enklavë për milionerë të huaj e vendorë”, tha ajo.
Ajo deklaroi se zonat e Zvërnecit dhe Sazanit po përballen me privatizim të natyrës dhe shpronësim të hapësirave publike.
“Zvërneci dhe Sazani shpesh herë portretizoheshin në mediat ndërkombëtare si diamantet natyrore të Shqipërisë. Edhe si të tilla nuk është e çuditshme për ne, që nën këtë qeverisje grabitçare, herë do kur, apetitet e kapitalit global, të përfaqësuar me këtë rast prej Jared Kushner dhe Ivanka Trump, me zbarku në këto toka edhe me fillu shpronësimin e tyre prej publikut në private”, tha ajo.
Sijarina tha se, sipas tyre, projektet turistike po favorizojnë interesa të grupeve të pasura në dëm të komuniteteve lokale dhe mjedisit.
“Oligarkia nuk pranon, nuk duron që pasunia me qenë publike edhe me iu përkit qytetarëve. Që natyra me ekzistu përtej kthetrave të tyre. Kësisoj, me aminin e Edi Ramës, kjo tokë u shit, dhe menjëherë zotërinjtë e rinj, zionistë e oligarkë, filluan brutalizimin e tyre ndaj natyrës dhe popullatës vendase. Duke grabitur jo veç tokat, por dhe mundësinë për jetë në ato zona, e edhe duke grabitur protestues në pikë të ditës”, tha ajo.
Ajo shtoi se protestat në Shqipëri po sfidojnë, sipas saj, modelin neoliberal të zhvillimit dhe mënyrën e qeverisjes së kryeministrit Edi Rama.
“Këto ditë, të privatizimit të egër kapitalist dhe qeverisjes autokratike të Edi Ramës që ka kap toka, media e çdo celul institucionale, po duket se po i tronditen themelet. Rezistenca dhe bashkimi mbarëpopullor i popullit shqiptar, përveç që po e sfidojnë prej periferisë neoliberalizmin që po na shitet si modeli i vetëm zhvillimor në rajonin tonë, po e artikulojnë atë në të vërtetën e saj. Një regjim që shpronëson, dërmon, shkatërron jetën dhe ekosistemin, veç për pasurimin e paskajshëm të 1%-shit”, tha ajo.
Sipas saj, kundërshtimi ndaj këtyre projekteve përfaqëson revoltë ndaj mënyrës së qeverisjes dhe trajtimit të qytetarëve.
“Ky refuzim i këtij partneriteti hanjie, për ne këtu nuk është veç një protestë. Është edhe një kryengritje ndaj qeverisjes që tradhton popullin, tenton me e shndërru atë në një argat të pakicës pasanike që është edhe gjakpirëse, edhe tenton me i shukat me dhunë popullin kur çohet me mbrojt veten dhe tokën e vet”, tha ajo.
Ajo tha se protestuesit në Kosovë mbështesin qytetarët në Shqipëri në kundërshtimin e projekteve që, sipas saj, rrezikojnë natyrën dhe interesin publik.
“Andaj, sot prej Kosovës ne ua kumtojmë shoqeve e shokëve tanë në Shqipëri, e krejt popullit shqiptar atje, që lufta e tyre është edhe e jona. E themi qartë se kjo luftë është po aq e drejtë sa edhe e domosdoshme. Që populli shqiptar nuk mund të jetë i lirë kur pranga të miliarderëve zionistë po zbarkojnë edhe në Shqipëri, për me kolonizu edhe tokat shqiptare. Prandaj, sot e përherë rreshtohemi krejt drejt edhe pranë atyre që sot po luftojnë për veten edhe tokat e tyre. Për natyrën dhe për jetën. Edhe qëndrojmë të bindur se, populli shqiptar do të triumfojë. Edi Rama dhe miqtë e tij do të mposhten. Zvërneci, Sazani, Rrjoll, Lumi i Vjosa s e çdo cep i vjedhur, do t’i kthehen Shqipërisë dhe popullit shqiptar. Dhe e vetmja koloni që do të qëndrojë është ajo e flamingove”, tha ajo.
Ditëve të fundit, Shqipëria është përfshirë nga protesta qytetare dhe mjedisore kundër projekteve të investimeve turistike luksoze në zonat e mbrojtura ekologjike.
Protestat po udhëhiqen nga aktivistë të shoqërisë civile, banorë lokalë dhe organizata rinore, të cilët kundërshtojnë ndërtimin e komplekseve hoteliere dhe vilave luksoze në Peizazhin e Mbrojtur Pishë Poro-Nartë dhe në Ishullin e Sazanit, duke paralajmëruar për dëme të pariparueshme në ekosistem./EO
