Edicioni i katërt i Festivalit dhe Panairit Librit për Fëmijë në Prishtinë ka nisur me promovimin e librit “Unë jam Majlinda Kelmendi”, të autores Teuta Berisha, e cila zhvilloi një bashkëbisedim me lexuesit e klasëve te treta dhe të shtata.
Gjatë aktivitetit, Berisha ka ndarë me fëmijët detaje nga historia e kampiones olimpike, sfidat në rrugëtimin e saj dhe sukseset që Majlinda Kelmendi i ka arritur duke u ngritur bashkë me shtetin e Kosovës.
“Rrëfimi i Majlinda Kelmendit është më shumë se një histori sportive, është dëshmi e përkushtimit, disiplinës dhe këmbënguljes për të arritur majat më të larta. Këto janë vlera që meritojnë të përcillen te secili fëmijë. Kampionja olimpike është shembulli më i mirë se si përmes sportit mund të përfaqësohet denjësisht Kosova, të forcohet identiteti ynë dhe të dëshmohet se, edhe në kohë sfidash politike, patriotizmi mund të shprehet përmes punës, suksesit dhe përfaqësimit dinjitoz të shtetit tonë”, tha Berisha.
Festivali dhe Panairi i Librit për Fëmijë është i hapur deri më 27 shtator.
