Sindikata e Pavarur e Minatorëve të Trepçës ka njoftuar se ka pranuar vendimin e Prokurorisë Speciale për hedhjen poshtë të kallëzimit penal ndaj kryetarit të sindikatës, një pjese të kryesisë dhe gjashtë minatorëve.
Sipas sindikatës, kallëzimi penal ishte iniciuar nga menaxhmenti i kaluar.
Tutje, Sindikata ka theksuar se ende ka persona në pozita drejtuese që e konsiderojnë veten mbi ligjin, mbi punëtorët dhe mbi sindikatën teksa ka kritikuar menaxherët që, sipas saj, nuk e kuptojnë rolin dhe funksionimin demokratik të sindikatave, duke pretenduar se përmes presioneve, shantazheve, suspendimeve dhe kallëzimeve penale synojnë të heshtin zërin e minatorëve.
Ndërkaq, sipas vendimit të Prokurorisë, nuk është vërtetuar me asnjë provë se të dyshuarit kanë kryer veprat penale të sabotimit, keqpërdorimit të së drejtës së grevës apo ndonjë vepër tjetër penale.
