Një toger policor është larguar nga puna të enjten, e Policia e Kosovës ka dhënë arsyet për largimin e tij. Sipas Policisë, A.V., me detyrë në Pejë, është larguar për shkak të shkeljeve disiplinore.
Në sqarim thuhet se ndaj këtij zyrtari, që nga inkuadrimi në Polici e deri në largimin nga detyra, janë iniciuar 15 raste, ku prej tyre janë trajtuar 13 në nivel qendror dhe 2 në nivel rajonal.
“Nga 15 raste të iniciuara, 3 prej tyre kanë pasur të bëjë me shkrime dhe komente në rrjete sociale, ku në total janë shqiptuar 6 masa disiplinore ,duke përfshirë edhe rastin e fundit në gusht 2026, Ndërprerje e Marrëdhënies së Punës me vendim të PK-së”, thuhet në arsyetimin e PK-së.
Tutje PK sqaron se në 3 rastet e trajtuara që kanë të bëjnë me rrjetet sociale, janë shqiptuar masat: Ndalesë në pagë 30% për 2 muaj, e iniciuar në vitin 2016 dhe shqiptuar masa po ashtu në vitin 2016; Ndalesë në pagë 30% për 6 muaj, e iniciuar në vitin 2025 dhe shqiptuar masa në vitin 2026; si dhe e fundit “Ndërprerje e marrëdhënies së punës”, e iniciuar në vitin 2026 dhe shqiptuar masa po ashtu në vitin 2026.
Policia ka theksuar se togeri A.V. ka dëmtuar imazhin e saj duke shpërndarë përmbajtje nëpër rrjete sociale.
“Neni 20. Sjellja e rëndë diskredituese, paragrafi 1, pika 1.14. Sillet në mënyrë të tillë duke dëmtuar imazhin e Policisë së Kosovës gjatë kryerjes së detyrës apo jashtë saj; Neni 21 Mosbindja e rëndë, paragrafi 1, nen. par. 1.13. Me veprim apo mosveprim, nuk zbaton apo nënvlerëson urdhrat apo udhëzimet nga autoriteti i nivelit qendror; dhe Neni 24 Shkelja e rëndë e autorizimit paragrafi 1, nen. para. 1.17 Publikon, shfaq, shpërndan apo komenton postime, fotografi, video dhe incizime që dëmtojnë imazhin e Policisë”, janë nenet që Policia thotë se i ka shkelur zyrtari i larguar nga puna.
The post Policia largon nga puna një toger, thotë se ndaj tij ishin iniciuar 15 raste për shkelje disiplinore appeared first on Gazeta Express.
