Policia e Kosovës nis procesin e ri të gradimit, 157 vende të lira për gradën Toger

Ministri i Punëve të Brendshme në detyrë Xhelal Sveçla, ka njoftuar hapjen e procesit të gradimit në Policinë e Kosovës për gradën Toger, me gjithsej 157 pozita të lira.

Sipas tij  ky proces u dedikohet zyrtarëve policorë që plotësojnë kriteret ligjore dhe profesionale, me qëllim avancimin në karrierë dhe forcimin e kapaciteteve profesionale të Policisë së Kosovës.

Të drejtë aplikimi kanë zyrtarët policorë me të paktën dy vite përvojë në gradën Rreshter, si dhe zyrtarët me gradën Polic i Lartë që kanë së paku 10 vite përvojë aktive në Policinë e Kosovës. Afati për aplikim është deri më 12 qershor 2026.

Sipas Sveçlës, ky proces përbën një hap të rëndësishëm në reformimin e sistemit të karrierës brenda policisë, duke synuar rritjen e transparencës, meritokracisë dhe mundësive për avancim profesional.

Ai ka theksuar se për herë të parë po krijohet mundësia e avancimit edhe në dy grada njëherësh, si mënyrë për të adresuar bllokadat e mëhershme në proceset e gradimit dhe për të korrigjuar padrejtësitë e trashëguara.

“Ndërtimi i një Policie bashkëkohore, profesionale dhe me integritet fillon nga një sistem i drejtë karriere, ku avancimi bazohet në meritë, përvojë dhe shërbim ndaj qytetarëve dhe Republikës”, ka deklaruar Sveçla.

Ministria ka uruar suksese të gjithë zyrtarëve policorë që do të aplikojnë, duke theksuar se pas këtij procesi do të vazhdojnë edhe gradime të tjera në funksion të forcimit të mëtejmë të Policisë së Kosovës.

The post Policia e Kosovës nis procesin e ri të gradimit, 157 vende të lira për gradën Toger appeared first on Gazeta Express.