Dhuna shpërtheu të hënën mbrëma në Veternik të Novi Sadit, ku një tubim i qytetarëve u përshkallëzua në përplasje me persona të lidhur me Partinë Përparimtare Serbe (SNS) të presidentit Aleksandar Vuçiq.
Sipas dëshmive të pjesëmarrësve dhe dëshmitarëve, qytetarët ishin mbledhur në mënyrë paqësore, por më pas pranë tyre u shfaq një grup më i madh mbështetësish të SNS-së, të cilët i ndoqën edhe pasi protestuesit u zhvendosën drejt një rrethrrotullimi për të shmangur përplasjen.
Situata u tensionua dhe, sipas dëshmitarëve, disa qytetarë u sulmuan fizikisht. Raportohet për shuplaka, goditje në kokë dhe shqelma, ndërsa të paktën dy persona dyshohet se kanë pësuar lëndime. Njëri prej tyre raportohet se ka pësuar edhe dëmtim të dhëmbit.
Ajo që e bën edhe më shqetësuese ngjarjen është se, sipas dëshmive të publikuara, përplasjet ndodhën në prani të policisë serbe, e cila në disa momente dyshohet se qëndroi vetëm duke vëzhguar situatën.
Dhjetëra fotografi dhe video të publikuara nga vendngjarja dokumentojnë tensionet dhe përleshjet, ndërsa dëshmitarët pretendojnë se personat e lidhur me SNS-në iu vërsulën qytetarëve që po protestonin.
Pas incidentit, sipas informacioneve jozyrtare, policia arrestoi një qytetar nga grupi i protestuesve, ndërsa nuk raportohet për ndonjë arrestim nga radhët e mbështetësve të SNS-së.
Deri tani, policia serbe nuk ka dhënë një version zyrtar për ngjarjen dhe nuk ka konfirmuar numrin e të lënduarve apo të arrestuarve.
The post Plas dhuna në Serbinë e Vuçiqit: Militantë të SNS-së sulmojnë protestuesit në Veternik, gjithçka në sy të policisë appeared first on Gazeta Express.
