Deputetja aktuale e LSDM-së dhe ish-ministrja e Mbrojtjes, Slavjanka Petrovska, në brifingun e sotëm të organizatorëve të platformës „Biseda për të ardhmen në 12:05“, shpjegoi arsyet përse pakënaqësia me gjendjen në parti ka filluar të shprehet publikisht.
Sipas Petrovskës, para aktivizimit publik të platformës, për një periudhë prej rreth dy vitesh janë zhvilluar biseda brenda LSDM-së, përfshirë edhe me liderin e partisë, Venko Filipçe.
Ajo pretendon se bisedat nuk kanë sjellë ndryshime konkrete dhe se një pjesë e ndryshimeve të nevojshme sistemike nuk janë zbatuar.
„Për një periudhë më të gjatë kam folur brenda partisë, kam pasur disa biseda me kryetarin e partisë dhe ato biseda ose përfundonin me heshtje, ose me konfirmim, e më pas me moszbatimin e zgjidhjeve. Prandaj, pas dy vitesh vendosëm të paraqitemi publikisht“, tha Petrovska.
Ajo gjatë brifingut deklaroi gjithashtu se nga udhëheqësia aktuale e LSDM-së kishte marrë oferta për t’u bërë pjesë e saj, por se nuk i kishte pranuar kushtet me të cilat, sipas saj, ishin bërë këto oferta.
„Kisha oferta të pahijshme nga udhëheqësia që të bëhesha pjesë e saj, në këmbim të asaj që të shtyja gjëra nën tavolinë. Unë nuk u pajtova“, deklaroi Petrovska.
Petrovska vlerësoi se njerëzit e përfshirë në platformë nuk janë problemi i LSDM-së, por se mund të jenë pjesë e zgjidhjes për gjendjen në parti.
