Policia e Kosovës ka arrestuar dy persona të dyshuar për veprat penale “Fajdeja” dhe “Detyrim”, pas një operacioni të zhvilluar në Gjakovë.
Sipas njoftimit të Policisë, Njësia Rajonale e Hetimeve në Gjakovë, në bashkëpunim me Drejtorinë për Hetimin e Krimit të Organizuar dhe Krimeve të Rënda, si dhe njësitë e tjera policore, kishte pranuar informacione operative lidhur me zhvillimin e veprës penale “Fajdeja”.
Pas zbatimit të masave të veçanta hetimore, hetuesit policorë kanë arritur t’i kapin dy të dyshuarit në flagrancë gjatë marrjes së pagesave të kamatës nga një viktimë. Të dyshuarit janë arrestuar në vendngjarje.
Me urdhër të gjykatës, policia ka realizuar kontrolle në shtëpitë dhe objektet përcjellëse të të dyshuarve, ku janë gjetur edhe disa fishekë.
Pas intervistimit, me urdhër të prokurorit kompetent, të dyshuarit janë dërguar në mbajtje për 48 orë.
Ndaj tyre janë iniciuar raste për veprat penale: “Fajdeja”; “Detyrim”; “Mbajtja në pronësi, kontroll ose posedim i paautorizuar i armës”./Telegrafi/
