Presidenti i SHBA-së, Donald Trump ka kërcënuar se do të rrisë ndjeshëm tarifat doganore për automjetet që importohen nga Kanadaja, ndërsa lufta tregtare mes dy vendeve fqinje vijon të përshkallëzohet, raporton BBC.
Trump deklaroi të hënën se tarifat për makinat, kamionët dhe pjesët e automjeteve kanadeze do të rriten nga 25% në 50%, duke nisur nga 1 janari.
Vendimi vjen pasi negociatat tregtare mes SHBA-së dhe Kanadasë dështuan në fundjavën e kaluar. Të dyja palët kanë akuzuar njëra-tjetrën për paraqitjen e kërkesave të paarsyeshme në momentet e fundit të bisedimeve.
Ndërkohë, autoritetet kanadeze njoftuan të hënën në mbrëmje se do të mbajnë një konferencë për mediat të martën, ku pritet të shpjegojnë masat që Kanadaja do të ndërmarrë në përgjigje të përshkallëzimit të luftës tregtare.
Qeveria kanadeze ka deklaruar se synon të mbrojë dhe mbështesë punëtorët dhe bizneset vendase gjatë kësaj periudhe të vështirë.
Kryeministri kanadez, Mark Carney, e cilësoi kërcënimin e fundit të Trump si të pritshëm dhe akuzoi presidentin amerikan se synon të shkatërrojë industrinë kanadeze të automjeteve.
Carney tha se Kanadaja është e gatshme të rikthehet në tryezën e negociatave, por vetëm nëse SHBA-ja vjen me “qëndrimin e duhur”.
The post Përshkallëzohet lufta tregtare, Trump kërcënon me rritje të tarifave për makinat kanadeze: Duke nisur nga 1 janari appeared first on Gazeta Express.
