Qytetarë të shumtë janë mbledhur të enjten mbrëma në sheshin “Skënderbeu” në Prishtinë, në ditën e nëntë të protestës me moton “Jo në emrin tim”, për të kundërshtuar aktgjykimin e Dhomave të Specializuara të Kosovës në Hagë ndaj ish-krerëve të Ushtrisë Çlirimtare të Kosovës (UÇK).
Protestuesit kanë shprehur kundërshtimin e tyre ndaj vendimit të shkallës së parë dhe kanë kërkuar drejtësi për Hashim Thaçin, Kadri Veselin, Rexhep Selimin dhe Jakup Krasniqin.
Në shesh janë vendosur pankarta dhe mesazhe në mbështetje të ish-krerëve të UÇK-së, ndërsa slogani “Jo në emrin tim” ka vazhduar të jetë motoja kryesore e protestës.
Gjatë tubimit, njëri nga organizatorët, Çlirim Haziri, u ka bërë thirrje qytetarëve që të qëndrojnë së bashku në shesh deri më 1 tetor, kur pritet të mbahet një protestë e madhe e organizuar nga organizatat e dala nga lufta dhe studentët.
“Kam një ftesë e një thirrje për ju. Të rrijmë bashkë deri më 1 tetor, deri në thirrjen e madhe, do t’i përgjigjemi ftesës së madhe të organizatave të dala nga lufta, studentëve… e deri në atë natë do të qëndrojmë në shesh, derisa të na dëgjohet zëri ynë”, tha Haziri.
Në përvjetorin e tretë të rënies në detyrë të rreshterit të Policisë së Kosovës, Afrim Bunjaku, Haziri u ka bërë thirrje protestuesve që të mbajnë një minutë heshtje në nderim të jetës dhe sakrificës së tij.
Bunjaku u vra më 24 shtator 2023 në Banjskë të Zveçanit, gjatë sulmit të armatosur të kryer nga një grup i udhëhequr nga Milan Radoiçiq.Haziri ka kritikuar institucionet e Kosovës për atë që e konsideroi mungesë të urgjencës në trajtimin e kërkesave të protestuesve lidhur me ish-krerët e UÇK-së.
Ai ka thënë se vëmendja e protestuesve nuk është e përqendruar vetëm te zhvillimet në Hagë, por edhe te veprimet e institucioneve në Prishtinë.
“Sonte pyetja nuk është çka po bëjmë ne këtu sot në Kosovë. Çka po bëjnë institucionet? Nuk mjafton të themi nga Prishtina: Qëndroni të fortë! Sonte nuk dua të flas vetëm për Hagën, por për Prishtinën”, deklaroi Haziri.
Duke iu referuar mbledhjes së Kryesisë së Kuvendit, ai ka thënë se në rendin e ditës janë përfshirë çështje të ndryshme, ndërsa kërkesat e protestuesve për UÇK-në nuk janë trajtuar.
“Nesër në ora 11:00 mblidhet Kryesia e Kuvendit, janë 16 pika në rend të ditës. Komisione, raporte, shpenzime, udhëtime, por ajo për të cilën ne po rrimë në shesh nuk është në rend të ditës”, tha ai.
Haziri u ka drejtuar institucioneve pyetjen nëse çështja e UÇK-së është urgjente për to dhe kur do të gjendet koha për trajtimin e kërkesave të protestuesve.
“Nuk mjafton të na thonë që janë me UÇK-në. Institucionet maten me vendime”, u shpreh ai.
Në fjalimin e tij, Haziri ka paralajmëruar se protesta do të vazhdojë nëse institucionet nuk reagojnë ndaj kërkesave të tyre.
“Mos mendoni se duke e shtyrë këtë çështje do të harrohet. Ne nuk po kërcënojmë, por mos e matni vendosmërinë tonë, mos na matni. Nëse heshtja e Parlamentit, e Qeverisë, e institucioneve vazhdon, reagimi ynë do të rritet”, tha ai.
Ai ka kërkuar përgjigje nga institucionet lidhur me veprimet që kanë ndërmarrë për çështjen e UÇK-së, duke theksuar se protestuesit do të vazhdojnë të qëndrojnë në shesh.
“Çka po bëni që nëntë ditë për UÇK-në? Ne po presim përgjigje, nuk largohemi nga ky shesh pa një përgjigje”, përfundoi Haziri.
