Specat dhe rrushi i tryezës, të kthyer nga Bullgaria dhe Mali i Zi pasi në këto vende ishin konstatuar mbetje pesticidesh mbi kufijtë e lejuar, janë hedhur në qarkullim në Maqedoni pas analizave laboratorike shtesë.
Sipas Agjencisë së Ushqimit dhe Veterinarisë, gjatë tre muajve të fundit në vend janë kthyer katër dërgesa – tri me speca dhe një me rrush të zi të tryezës. Pas kthimit të tyre, AUV-ja ka kryer kontrolle shtesë, ndërsa analizat e kryera në vend nuk kanë treguar praninë e mbetjeve të pesticideve.
Dy dërgesa me speca nga Bullgaria janë analizuar në laboratorë të akredituar, ndërsa mostrat nga dërgesa e dytë janë testuar edhe në Laboratorin Shtetëror Fitosanitar dhe në një laborator në Strumicë. Rezultatet kanë qenë negative, pas së cilës dërgesat janë liruar për qarkullim ose për përpunim të mëtejshëm.
Edhe 14 tonë rrush i zi i tryezës, i kthyer nga Mali i Zi, pas analizave shtesë është liruar për qarkullim ose për përpunim.
Ndryshe nga këto raste, dërgesa me specin e kuq të varietetit “Kurtovska kapija”, e kthyer nga Kroacia, është asgjësuar në mënyrë të sigurt.
Gjatë së njëjtës periudhë, AUV-ja ka marrë edhe katër njoftime nga Kroacia përmes Sistemit Evropian të Paralajmërimit të Shpejtë për Ushqimin, të cilat kanë të bëjnë me afro 50 tonë fruta dhe perime maqedonase, përfshirë kumbulla dhe speca.
Një pjesë e dërgesave është asgjësuar, ndërsa pjesa tjetër është ndaluar në kufi dhe nuk është lejuar të hidhet në qarkullim.
