Kushtet e një marrëveshjeje të mundshme që mund t’i japë fund luftës mes SHBA-së dhe Iranit ende nuk janë bërë plotësisht të qarta, por një nga ndërmjetësuesit kryesorë sinjalizoi sot se ajo mund të finalizohet brenda “24 orëve të ardhshme”.
“Kurrë nuk kemi qenë më afër një marrëveshjeje paqeje se tani”, shkroi në platformën X kryeministri i Pakistanit, Shehbaz Sharif. Ai shtoi se, nëse marrëveshja finalizohet, ajo do të nënshkruhet menjëherë në mënyrë elektronike, shkruan CNN, transmeton Dukagjini.
Sipas Sharifit, pas nënshkrimit do të pasojnë “bisedime në nivel teknik javën e ardhshme”.
Një burim i njohur me negociatat i tha gjithashtu CNN-it se nënshkrimi elektronik i marrëveshjes pritet të ndodhë deri në fund të ditës së nesërme, madje mund të ndodhë edhe më herët. Burimi tha se ekziston një dëshirë e përbashkët që nënshkrimet të sigurohen sa më shpejt, në mënyrë që procesi të mos pengohet apo dështojë.
CNN ka kërkuar koment nga Shtëpia e Bardhë.
“Jemi të bindur se kjo marrëveshje historike paqeje do të krijojë një bazë të fortë për paqe afatgjatë”, tha Sharif në postimin e tij.
Ndërkohë, edhe pse kushtet e marrëveshjes së mundshme nuk janë bërë publike zyrtarisht, një zyrtar i lartë i administratës amerikane i tha CNN-it se korniza e saj do të përfshijë rihapjen e Ngushticës së Hormuzit dhe heqjen e bllokadës amerikane ndaj porteve iraniane.
Sipas të njëjtit zyrtar, marrëveshja do të sjellë gjithashtu fundin e disa presioneve ekonomike ndaj Iranit, si dhe çmontimin e programit bërthamor të Teheranit.
Megjithatë, detajet teknike për mënyrën se si do të hiqet stoku iranian i uraniumit të pasuruar në nivel të lartë ende nuk janë përcaktuar, tha një tjetër zyrtar i lartë i administratës amerikane për CNN.
