Ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli, ka njoftuar se janë shkëputur kontratat e punës për edhe 9 zyrtarë në institucionet vartëse të kësaj ministrie.
Sipas njoftimit të Pacollit, shtatë prej tyre janë zyrtarë të Agjencisë për Mbrojtjen e Mjedisit të Kosovës (AMMK), ndërsa dy të tjerë të Agjencisë Kadastrale të Kosovës (AKK), nga komuniteti serb, të cilët, sipas saj, njihen edhe si pjesëtarë të ish-“Mbrojtjes Civile”.
Vendimet për ndërprerjen e marrëdhënies së punës janë marrë për shkak të mungesës së vazhdueshme në vendin e punës, si dhe bazuar në rekomandimet e Zyrës Kombëtare të Auditimit.
“Askush nuk mund të mbajë statusin e të punësuarit pa përmbushur detyrimet që rrjedhin nga kontrata e punës. Do të jemi të pakompromis në zbatimin e ligjit, pa dallim përkatësie apo pozite, sepse zyrtari publik duhet t’u shërbejë qytetarëve me përgjegjësi dhe respektim të plotë të detyrës zyrtare”, ka deklaruar Pacolli.
Me këto vendime, numri i përgjithshëm i kontratave të punës të shkëputura në kuadër të MMPH-së dhe institucioneve vartëse ka arritur në 29. Më herët, sipas njoftimit të ministres në detyrë, janë shkëputur kontratat për 20 zyrtarë të ministrisë.
