Ish-presidentja, Vjosa Osmani ka reaguar me një foto, pasi ministri në detyrë i Punëve të Jashtme, Glauk Konjufca, u shfaq dje në një tubim duke qeshur me një term që po përdoret në mënyrë përçmuese për ish-presidenten.
Osmani në reagimin e saj ka thënë se asnjë grua që punon nuk duhet të jetë objekt përqeshjeje
“Shtetin e çon përpara puna, jo urrejtja e përçmimi. Asnjë grua që punon nuk duhet të jetë objekt përqeshjeje”, thuhet në reagimin e saj.
Osmani theksoi se çdo grua meriton respekt, pavarësisht profesionit apo vendit të punës — qoftë në sallon, market, shkollë, spital, zyrë, universitet apo në biznes privat.
Ajo i quajti gratë “shtylla të Kosovës” dhe “heroinat e përditshme”, të cilat çdo ditë kontribuojnë për familjen, shoqërinë dhe ekonominë e vendit.
“Janë gra që punojnë pa u ndalur, edhe kur askush nuk ua sheh mundin. Kujdesen, krijojnë, shërbejnë, rrisin fëmijë dhe ndërtojnë jetë me djersën e tyre”, vijon mesazhi.
Në fund, ajo nënvizoi se “gruaja e lodhur nga puna vlen më shumë se mijëra fjalë boshe”, duke bërë thirrje për më shumë respekt dhe dinjitet ndaj grave në shoqëri./teve1.info/
