Kandidati për deputet nga Lidhja Demokratike e Kosovës, Shaban Osmanaj, ka deklaruar se subjekti i tij politik po synon fitore në zgjedhjet e parakohshme parlamentare që pritet të mbahen më 7 qershor.
Në emisionin “Info Nata” në Tëvë1, Osmanaj ka thënë se Lëvizja Vetëvendosje ka pasur tri herë mundësinë për të qeverisur me mbështetje të madhe qytetare, por sipas tij, nuk ka arritur të krijojë institucionet e nevojshme.
Ai është shprehur se qytetarët mund të lodhen nga situata politike dhe të ndëshkojnë edhe VV-në, ashtu siç, sipas tij, kanë ndëshkuar më parë LDK-në.
“Po garojmë për fitore dhe mendoj se qytetari i Republikës së Kosovës ka bërë mirë që ka sjellë ndryshim dhe që Vetëvendosja e ka marrë pushtetin, sepse ne e dimë që ka qenë parti rebele. Qytetari e ka parë se, në momentin që e merr pushtetin, duhet të kesh përgjegjësi dhe ai po e vëren këtë çdo ditë. I është dhënë mundësia tri herë dhe nuk ka kuptim që, pasi të marrësh një përqindje të caktuar, të mos marrësh përgjegjësinë e plotë për krijimin e institucioneve. Duhet të krijosh ‘shtëpinë’ tënde, ku duhet të ketë një zot shtëpie dhe institucione funksionale. Kosova ka vuajtur për institucione; ne kemi dalë nga lufta dhe duhet t’i mbrojmë me përgjegjësi. Nuk duhet të vihet në dyshim zgjedhja e presidentit, qeverisë apo Kuvendit, sepse institucionet tona dhe administrata varen nga to. Kjo situatë nuk mund të zgjasë pafund, sepse qytetari një ditë lodhet dhe ndëshkon, ashtu siç ka ndëshkuar LDK-në, mund të ndëshkojë edhe VV-në”, ka deklaruar Osmanaj.
Duke folur për ofertën politike të LDK-së, ai ka thënë se partia e tij synon t’i bindë qytetarët përmes frymës shtetformuese dhe bashkëpunuese.
“Qytetarët i bindim me zotimin se LDK-ja është shtetformuese dhe përbashkuese. Është një parti që i do institucionet dhe i ka krijuar ato. LDK nuk do zhurmë, por dëshiron veprim,” ka thënë ai.
Sa i përket mundësisë së bashkëpunimit me VV-në pas zgjedhjeve, Osmanaj është shprehur në favor të bashkëpunimit politik për krijimin e institucioneve.
“Le ta harrojmë ngërçin dhe bllokimin dhe le të mendojmë ndryshe. Rugova thoshte se nuk është e mirë që të fitohet shumica; thoshte ‘le të fitojnë të gjithë nga pak’, kjo është demokracia. Ne kemi dalë nga një sistem komunist në të cilin një parti ka fituar mbi 90 për qind dhe nuk është zhvilluar vendi, prandaj le të fitojmë të gjithë. Unë nuk jam në struktura udhëheqëse të LDK-së dhe as në strukturat ku merren vendimet, por sigurisht jam pro bashkëpunimit me të gjithë ata që u jepet përgjegjësia për krijimin e institucioneve. Natyra ime nuk është bllokuese, përkundrazi, edhe në punën time jam gjithmonë për bashkëpunim, sepse nuk mund të bësh asgjë vetëm,” është shprehur ai.
Duke komentuar deklaratën e kreut të VV-së, Albin Kurti, se synojnë të marrin 60 për qind të votave, Osmanaj ka theksuar se në demokraci secili ka të drejtë të synojë fitore, por ka shtuar se pushteti duhet të ndahet dhe të funksionojë përmes bashkëpunimit institucional.
Sipas tij, sfida kryesore mbetet krijimi i institucioneve funksionale dhe zgjedhja e organeve shtetërore, përfshirë presidentin dhe qeverinë.
“Ne po jetojmë në demokraci, Kurti ka të drejtën të mendojë atë që mendon, sigurisht që për këtë vendos qytetari. Edhe unë kam dëshirë që LDK-ja t’i marrë 100%, por në fakt nuk është e shëndetshme. Absolutisht, fitorja duhet të jetë, por ajo duhet të ndahet me të tjerët. Kurtit i është dhënë mundësia dhe, le të themi, mund të shkojë deri në 60 për qind, por ai nuk ka dhënë prova se krijon qeveri dhe institucione, përfshirë presidencën. Është hera e parë që nuk po mund ta zgjedhim presidentin,” ka përfunduar Osmanaj.
