OpenAI po lanson një version të ChatGPT të krijuar për adoleshentët, brezi i parë që po rritet me inteligjencën artificiale, të cilët tashmë po e përdorin atë për detyrat e shkollës, pyetje rreth jetës së përditshme dhe madje edhe për shoqërim.
Kompania me bazë në San Francisko thotë se ChatGPT për adoleshentët, i cili lansohet të martën, është përshtatur për fëmijët e moshës 13 deri në 17 vjeç, me masa më të forta mbrojtëse, përfshirë kufizime për përmbajtje që lidhet me çështje të tilla si vetëvrasja, vetëlëndimi dhe bisedat romantike ose seksuale. Ai ofron gjithashtu mbështetje për detyrat e shtëpisë dhe studimet, e krijuar për t’i ndihmuar nxënësit të mësojnë, në vend që t’u japë drejtpërdrejt përgjigjet apo t’u shkruajë esetë e shkollës.
Kompania ka thënë se ideja është t’i udhëzojë adoleshentët drejt një përdorimi të shëndetshëm të inteligjencës artificiale, në një mjedis të përshtatshëm për moshën e tyre.
“Ne duam t’i trajtojmë adoleshentët si adoleshentë, që do të thotë se duhet të sigurohemi që t’u përshtatemi fazës së duhur të zhvillimit, pa folur me ta në mënyrë përçmuese dhe pa i trajtuar si fëmijë, por gjithashtu duke u siguruar që të mos ekspozohen ndaj materialeve që nuk duhet t’i shohin”, ka thënë Ann O’Leary, nënkryetare për politikat globale në OpenAI.
Prindërit me llogari të lidhura me llogarinë e adoleshentit mund të vendosin “orare qetësie”, gjatë të cilave adoleshenti nuk mund të përdorë ChatGPT, dhe mund të marrin njoftime sigurie në situata të kufizuara me rrezik të lartë, siç është mundësia që përdoruesi të dëmtojë veten.
Prindërit, edukatorët dhe ekspertët e zhvillimit të fëmijëve kanë shprehur shqetësime për përdorimin e chatbotëve të inteligjencës artificiale nga fëmijët, të cilët janë fajësuar se kanë lehtësuar kopjimin në detyrat e shkollës dhe madje edhe rastet e vetëvrasjeve.
Ndërsa edhe të rriturit mund të bien pre e prirjes për ta trajtuar inteligjencën artificiale si njeri dhe të krijojnë marrëdhënie jo të shëndetshme me të, truri i adoleshentëve ende nuk është zhvilluar plotësisht dhe ata mund të jenë veçanërisht të cenueshëm.
Në SHBA, më shumë se 70% e adoleshentëve po u drejtohen chatbotëve të inteligjencës artificiale për shoqëri, dhe gjysma e tyre përdorin rregullisht shoqëruesit virtualë me inteligjencë artificiale, sipas një studimi të vitit 2025 nga Common Sense Media, një organizatë që studion dhe promovon përdorimin e arsyeshëm të mediave digjitale.
