Biblioteka Kombëtare e Francës (BnF) ka zbuluar një dorëshkrim të panjohur të Mozartit në koleksionet e saj.
”Libri anonim dhe pa titull i muzikës i shekullit XVIII po përshkruhet nga ekspertët si një nga zbulimet më të rëndësishme të dekadave të fundit”, tha të premten drejtori i bibliotekës, Gilles Pécout.
Përdorimi i letrës franceze, si dhe përmbajtja – ushtrime kompozimi dhe shtatë pjesë për flaut dhe harpë – sugjerojnë, sipas institucionit, se dorëshkrimi buron nga mësimet e dhëna nga Wolfgang Amadeus Mozart midis majit dhe korrikut 1778 gjatë qëndrimit të tij të fundit në Paris.
Nxënësja e tij ishte Marie-Louise-Philippine de Guînes, një harpiste e talentuar nga një familje aristokrate muzikantësh.
Libri i muzikës, i cili u zbulua në shkurt në koleksionet e institucionit – një nga bibliotekat më të mëdha në botë – hedh dritë të re mbi qëndrimin e fundit të Mozartit në Paris.
Gjithashtu zbulon mësuesin e ri Mozart në punën e tij të përditshme – një aspekt i prodhimit të tij krijues që deri më tani është dokumentuar mezi.
Libri, në të cilin shkrimi i dorës së mësuesit dhe nxënësit shtrihet krah për krah, duket se dokumenton mësimet e fundit.
Ushtrimi i fundit mbeti i papërfunduar dhe gjashtë faqe në fund të librit janë bosh – sikur puna të kishte mbaruar papritur.
Në fakt, mësimet përfunduan me martesën e Mademoiselle de Guînes më 26 korrik 1778.
Kompozitori u lind në Salzburg në vitin 1756 dhe vdiq në Vjenë në vitin 1791 në moshën 35-vjeçare./atsh
