Nasim Haradinaj ka deklaruar publikisht mbështetjen e tij për Aleancën për Ardhmërinë e Kosovës (AAK) në zgjedhjet që pritet të mbahen më 7 qershor.
Në një postim të tij, Haradinaj i ka cilësuar këto zgjedhje si ndër më të rëndësishmet në historinë e pasluftës së Kosovës, duke theksuar se vendimi i tij politik është të mbështesë AAK-në si subjekt parlamentar.
Ai ka vlerësuar se Aleanca për Ardhmërinë e Kosovës ka qenë një “zë i fuqishëm opozitar” në Kuvendin e Kosovës, duke shtuar se partia ka qëndruar kundër çdo qeverie me argumente, por edhe ka treguar, sipas tij, konstruktivitet kur është diskutuar interesi shtetëror.
Haradinaj ka theksuar gjithashtu se prania e kësaj partie në Parlament është “garanci për vendin, lirinë dhe shtetin”, duke nënvizuar se ajo ka ditur të balancojë, sipas tij, qëndrimet e ashpra ndaj çështjeve që lidhen me shtetin me maturi politike kur është e nevojshme.
Në mesazhin e tij, ai ka shprehur mbështetje edhe për figurat politike të kësaj partie, përfshirë Ramush Haradinaj, duke i quajtur ata njerëz që, sipas tij, kanë qenë të përfshirë në proceset më të vështira të shtetndërtimit.
“Përherë dhe gjithmonë me çlirimtarët dhe ndërtuesit e shtetit,” ka shkruar ai në fund të deklaratës së tij.
The post Nasim Haradinaj shpreh pulblikisht mbështetje për AAK-në në zgjedhjet e 7 qershorit appeared first on Gazeta Express.
