Kandidati për deputet nga Lidhja Demokratike e Kosovës, Burim Meta, ka kritikuar qeverisjen e Lëvizjes Vetëvendosje gjatë një debati elektoral në emisionin “Këndi i Debatit” në Tëvë1, duke ngritur shqetësime për sektorin e sigurisë, trajtimin e shqiptarëve në Luginën e Preshevës dhe politikat sociale.
Duke folur për Forcën e Sigurisë së Kosovës, Meta tha se, pavarësisht investimeve të bëra ndër vite, ushtria vazhdon të përballet me mungesa në strukturën komanduese.
“Një ushtri në të cilën janë bërë investime të mëdha, siç e di më së miri edhe z. Isufi, i mungojnë gjashtë gjeneralë. Një ushtri e tillë nuk do të duhej të funksiononte me minus gjashtë gjeneralë. Kjo tregon se nuk është bërë sistemi i gradimit në ushtri, gjë që në gjuhën ushtarake është e dënueshme”, deklaroi Meta.
Ai kritikoi gjithashtu qasjen e institucioneve të Kosovës ndaj shqiptarëve në Luginën e Preshevës, duke e krahasuar me trajtimin që, sipas tij, u bëhet komuniteteve serbe në Kosovë.
“Në Preshevë, Medvegjë dhe Bujanoc shteti serb nuk i lejon fëmijët shqiptarë të regjistrohen dhe shumë qytetarëve ua heq shtetësinë, ndërsa pushteti ynë u jep beneficione serbëve, jo vetëm atyre që kanë jetuar këtu deri në vitin 1999, por edhe të tjerëve. Është e dhimbshme një gjë e tillë”, tha ai.
Një nga temat kryesore të debatit ishte edhe ndarja e mjeteve buxhetore. Meta kritikoi vendimin e Qeverisë për subvencionimin e biletave ajrore, duke thënë se prioritet duhet të ishte trajtimi i fëmijëve të prekur nga fibroza cistike.
“Si është e mundur që Qeveria Kurti të ndajë 2 milionë euro për sektorin më të zhvilluar, kompanitë ajrore, për të subvencionuar biletat, ndërsa 122 fëmijë me fibrozë cistike nuk trajtohen? Me ato para do të mund të mbulohej trajtimi i tyre për një vit të tërë”, u shpreh Meta.
Gjatë debatit, ai i drejtoi pyetje kandidatit të Lëvizjes Vetëvendosje, Nezir Kraki, duke kërkuar të dijë se cili prioritet është më i rëndësishëm: subvencionimi i biletave ajrore apo trajtimi i fëmijëve me sëmundje të rënda.
Kraki iu përgjigj duke thënë se “melankolia publike nuk funksionon në politikë”.
Pas kësaj deklarate, Meta reagoi ashpër.
“Melankoli politike për rrezikimin e jetës së fëmijëve me fibrozë cistike? Ja, ky është z. Kraki nga Parisi. Kjo është kultura”, deklaroi kandidati i LDK-së.
Debati u zhvillua në kuadër të fushatës zgjedhore, ku përfaqësuesit e partive politike prezantuan qëndrimet e tyre për çështje të ndryshme që lidhen me qeverisjen, sigurinë dhe politikat sociale në vend.
