Publicisti, Kim Mehmeti ka komentuar protestat e zhvilluara në Shqipëri kundër një investimi të planifikuar në zonën e Zvërnecit në Vlorë, duke i vlerësuar ato si shenjë të një gjenerate të re që, sipas tij, “e do shqiptarinë” dhe nuk ndihet inferiore ndaj të tjerëve.
Mehmeti ka thënë se të rinjtë që po protestojnë po i dërgojnë mesazh Evropës dhe botës se “dinë si ndërtohet shteti” dhe se shteti nuk mund të ndërtohet, sipas tij, me korrupsion dhe me njerëz që mbeten në pushtet duke dëmtuar interesin publik.
Sipas tij, këta të rinj që mbushin sheshet janë më proamerikanë dhe proevropianë sesa kryeministri i Shqipërisë Edi Rama, të cilin e akuzoi për dhënie të pjesëve të Shqipërisë për interesa politike dhe pushteti.
“Unë kam besuar gjithmonë se do të vijë ajo gjeneratë që nuk do të lejojë më projekte si ‘Ballkani i Hapur’, që e do shqiptarinë dhe ka dashuri për vetveten dhe popullin e vet, dhe që nuk ndihet inferiore ndaj të tjerëve, ndryshe nga shumë politikanë tanë që ndihen inferiorë. Këtu ndodhin gjëra absurde dhe përbuzëse ndaj shqiptarisë, që i japin botës sinjal të gabuar se ne nuk dimë të ndërtojmë shtet. Kjo rini i tha Evropës dhe botës: ‘ne dimë si ndërtohet shteti’, dhe se shteti nuk ndërtohet me hajdutë apo me ata që, për të mbetur në pushtet, e copëtojnë vendin. Ne nuk duam një shtet ku krijohen konflikte apo varësi për interesa të pushtetit”, ka thënë Mehmeti në emisionin “Këndi i Debatit” në Tëvë1.
Mehmeti ka shtuar se politikanët shpesh afrohen me fuqitë ndërkombëtare për interesa personale, duke përmendur edhe presidentin amerikan, Donald Trump.
“Gjithë këtë Rama e ka bërë për të mbrojtur veten dhe për t’u afruar sa më shumë me familjen Trump. Ai deri dje ishte me demokratët dhe thoshte se nëse Trump vjen në pushtet është fatkeqësi, por politikanët shpesh ndryshojnë qëndrime dhe afrohen me fuqitë e mëdha për të mbetur në pushtet dhe për të mbuluar problemet e tyre. Ne jemi proamerikanë, ndërsa këta të rinj që mbushin sheshet janë proevropianët e vërtetë. Nuk janë ata që bëjnë deklarata apo japin dhurata familjeve mbretërore dhe presidenciale vetëm për të shpëtuar veten. Kjo është ajo që duhej t’i ndodhte shqiptarisë, dhe nëse kjo dështon, atëherë do të duket se populli është i kapur nga kriminelët”, ka deklaruar Mehmeti.
Ai ka kritikuar edhe deklaratat se qeveria ndryshohet vetëm me votë, duke theksuar se sipas tij ndryshimi vjen edhe nga protestat.
“A e keni vërejtur çfarë po ndodh? Të gjithë dalin në debate dhe thonë se qeveria ndryshohet vetëm me votë. Jo, qeveria nuk ndryshohet vetëm me votë, ajo ndryshohet edhe me protestë. Vota e cakton qeverinë, por kur ajo e tepron, zëri i popullit del në rrugë dhe e rrëzon. Nëse do të ishte siç thonë ata, qeveritarët do të mund të bënin çfarë të donin dhe ne do të duhej të prisnim. Por kur situata përkeqësohet, populli reagon në rrugë, ndërsa më pas me votë caktohet qeveria e ardhshme”, ka përfunduar Mehmeti./teve1.info/
