Hysni Mehani, kryetar i degës së Lëvizjes Vetëvendosje në Skenderaj, ka vazhduar të mbaj qëndrimin e njëjtë se kryetari i kësaj komune, Sami Lushtaku e ka organizuar qëllimisht sulmin fizik ndaj tij.
Në një intervistë në emisionin “Info Nata” në Tëvë1, Mehani e cilësoi Lushtakun si person që nuk merr përgjegjësi për veprimet e veta dhe tenton të ushtrojë presion ndaj kundërshtarëve politikë.
Ai deklaroi se sulmi ndaj tij ishte i organizuar dhe kishte për qëllim frikësimin e tij dhe të aktivistëve të LVV-së në Skenderaj.
Mehani kritikoi gjithashtu nivelin e udhëheqjes lokale dhe tha se reagimet ndaj një postimi të tij në rrjetet sociale, ku e kishte cilësuar Lushtakun si “Sami Serbia” janë përdorur si arsyetim për tensionet e fundit, megjithëse, sipas tij, ai postim kishte kohë që ishte publikuar dhe nuk kishte shkaktuar reagime më herët.
“Lushtaku shitet që është trim, por primitiv, sepse kur e bën aktin të paktën duhet ta marrë edhe përgjegjësinë. Është qyqar dhe fshihet pas të bëmave, diçka që secili qytetar i Kosovës e di që është gënjeshtër, por ai nuk i njeh vlerat morale dhe etike njerëzore. Çfarë të themi për një qenie të tillë që ende vendos për fatin e njerëzve dhe shëtitet i lirë. Fatkeqësia jonë është që kemi kryetarë komunash që s’e kanë kryer as klasën e katërt dhe nuk arrijnë me kuptua as sarkazëm e as ironinë. Por, edhe për ata që s’i kuptojnë këto, unë e kam bërë sqarimin e atij postimi e ai postim ka kaluar muaj që është postuar. Ne kemi mbajtur mbledhje komunale dhe jemi takuar me kriminelin Lushtaku edhe s’ka pasur asnjë reagim”, tha ai në Tëvë1.
“Sulmi i Sami Lushtakun ndaj meje është qyqar dhe tinëzar. E ka pasur pas vete bandën dhe ka ardh me më sulmua për me krijua një ‘fitore’ se ja çfarë bëj unë dhe si arrijë me i terrorizua njerëzit që janë në jetën e tyre më normale”.
