Një ushtar i ushtrisë amerikane është arrestuar në Britaninë e Madhe, nën dyshimin për spiunazh në favor të Rusisë, bëjnë të ditur autoritetet britanike kundër terrorizmit.

Ushtaraku 41-vjeçar, me gradë të lartë, u arrestua të martën në afërsi të Gloucesterit, transmeton klankosova.tv

Policia Kundër Terrorizmit në Londër njoftoi se arrestimi u krye në bazë të neneve 1 dhe 3 të Ligjit për Sigurinë Kombëtare të vitit 2023 (National Security Act 2023).

Neni 1 i këtij ligji lidhet me marrjen ose zbulimin e informacioneve të mbrojtura, ndërsa neni 3 parashikon veprën e ndihmës ndaj një shërbimi të huaj të inteligjencës.

Drejtori i FBI-së, Kash Patel, në një deklaratë lidhur me rastin, tha:

“Ky arrestim i rëndësishëm lidhet me akuza për spiunazh, çështje që përbën shqetësim maksimal për Shtetet e Bashkuara dhe aleatët tanë”.

Sipas BBC, zëvendëskomisionerja ndihmëse Vicki Evans, nga Policia Kundër Terrorizmit në Londër, e cilësoi arrestimin si “të rëndësishëm”.

“Akuzat janë serioze dhe hetimi ynë është ende në zhvillim të plotë”, deklaroi ajo.

Ushtari, identiteti i të cilit nuk është bërë publik, aktualisht mbahet në paraburgim në një stacion policor në Londër.