Presidenti amerikan, Donald Trump, ka deklaruar se Ukraina duhet të zgjedhë një udhëheqës të ri, pas kritikave të presidentit ukrainas, Volodymyr Zelensky, ndaj marrëveshjes së re për naftën ruse mes Shteteve të Bashkuara dhe Rusisë.
Duke folur para gazetarëve jashtë Shtëpisë së Bardhë, Trumpi e akuzoi Zelenskyn se po i shkakton probleme botës duke vazhduar sulmet ndaj rafinerive ruse.
“Bën mirë nëse i ndal”, ka deklaruar Trumpi, duke sugjeruar se Ukraina duhet të ketë një udhëheqës të ri që mund të arrijë marrëveshje.
Sipas Trumpit, administrata amerikane i ka kërkuar Ukrainës të mos sulmojë rafineritë ruse, me arsyetimin se këto sulme krijojnë probleme për tregun global të energjisë.
Ai pretendoi gjithashtu se Zelensky ka pasur mundësi të arrijë marrëveshje, por ka gjetur arsye për të mos i realizuar ato.
Deklaratat e Trumpit erdhën pasi Zelensky kritikoi marrëveshjen SHBA-Rusi për eksportet e naftës ruse, duke e akuzuar Uashingtonin se po kontribuon në financimin e luftës së Moskës.
Zelensky deklaroi se Rusia kishte sulmuar civilët ukrainas, përfshirë ndërtesat e banimit në Zaporizhzhia, pas njoftimit për lehtësimin e kufizimeve ndaj eksporteve të naftës ruse.
“Të shtunën, Rusia shprehu falënderimet e saj për heqjen e sanksioneve mbi eksportet e naftës duke hedhur pesë bomba rrëshqitëse në ndërtesa banimi në Zaporizhzhia”, shkroi Zelensky në rrjetet sociale.
Trumpi kishte njoftuar më herët se kishte arritur marrëveshje me presidentin rus, Vladimir Putin, që Rusia të furnizonte tregun amerikan dhe atë global me më shumë se 300 mijë tonë naftë.
Marrëdhëniet mes Trumpit dhe Zelenskyt janë shoqëruar edhe më parë me përplasje publike. Në shkurt të vitit 2025, një takim mes tyre në Shtëpinë e Bardhë u karakterizua nga një debat i ashpër lidhur me luftën në Ukrainë, marrëdhëniet me Rusinë dhe mbështetjen amerikane për Kievin.
Sinjali – aty ku e vërteta flet para lajmit!
The post Trumpi i del kundër Zelenskyt: Ka ardhur koha që Ukraina ta zgjedhë një president të ri appeared first on Sinjali.
Burimi: Sinjali
