Derisa Jona Krasniqi ndodhet në shtëpinë e Big Brother VIP Kosova 5, familjarët kanë reaguar përmes llogarisë së saj në Instagram lidhur me akuzat dhe komentet që kanë nisur të qarkullojnë ndaj saj.

Në një postim të gjatë në InstaStory, familja ka rikthyer në vëmendje disa ngjarje nga e kaluara e Jonës, duke shprehur shqetësim për mënyrën se si po trajtohet ajo në rrjetet sociale.

Në reagim përmendet se, para më shumë se dhjetë vjetësh, Jona kishte krijuar një grup në Facebook për vajzat shqiptare, ku gratë që jetonin në Gjermani, Austri dhe Zvicër mund të diskutonin për rolin e tyre në kulturën shqiptare dhe problemet me të cilat përballeshin.

Foto: Screenshot/Instagram

Familjarët theksojnë se ajo gjithmonë ka pasur qëndrime feministe dhe ka mbrojtur të drejtën e grave për të jetuar të lira, për të marrë vendimet e tyre dhe për të mos u gjykuar nga shoqëria.

Megjithatë, sipas tyre, këto qëndrime nuk janë pritur gjithmonë mirë dhe Jona është përballur edhe me fyerje.

Në postim përmendet gjithashtu një deklaratë e saj e bërë para rreth dhjetë vjetësh, për të cilën familja thotë se nuk duhet të përdoret si arsye për ta sulmuar vazhdimisht.

Ata rikujtojnë se në atë kohë ajo ishte rreth 20 vjeçe dhe se njerëzit mund të ndryshojnë me kalimin e viteve.

Një pjesë tjetër e reagimit lidhet me fotografi të falsifikuara, të cilat, sipas familjes, ishin krijuar përmes teknologjisë ‘deepfake’ dhe paraqisnin Jonën në imazhe të zhveshura.

Familjarët pretendojnë se këto fotografi ishin shpërndarë publikisht dhe u ishin dërguar edhe familjarëve të saj.

Sipas tyre, Jona kishte bërë kallëzim penal në polici ndaj personit që dyshohej se qëndronte pas këtij veprimi.

Në fund, familja shpreh pakënaqësi për fushatën e komenteve dhe fyerjeve që, sipas tyre, po zhvillohet ndaj Jonës, duke ngritur edhe pyetjen se si mund të pritet që gratë të flasin kundër dhunës dhe të mbrojnë njëra-tjetrën, nëse një grua që ka kaluar situata të tilla vazhdon të përballet me sulme të ngjashme. /Telegrafi/