Ndalimi kombëtar i fluturimeve në të gjithë Shtetet e Bashkuara të Amerikës, i cili preku nisjet e avionëve në aeroportet e vendit, është hequr pas gati pesë orësh.
Megjithatë, udhëtarët duhet të përgatiten për vonesa të konsiderueshme, pasi aeroportet po përpiqen të përballojnë fluksin e krijuar nga grumbullimi i fluturimeve të shtyra gjatë periudhës së ndërprerjes.
Sekretari amerikan i Transportit, Sean Duffy, dhe sekretari i Sigurisë Kombëtare, Markwayne Mullin, mbajtën një konferencë për media, ku shpjeguan arsyet që çuan në vendosjen e ndalimit.
Sipas tyre, vendimi u mor për shkak të të dhënave jokonsistente që po transmetoheshin nga pajisjet e vjetruara të sistemit të kontrollit të trafikut ajror.
Duffy fajësoi për situatën sistemet e vjetra të kontrollit të trafikut ajror, të cilat, sipas tij, nuk janë përditësuar për shkak të mungesës së financimit nga Kongresi amerikan. Ai kërkoi 50 miliardë dollarë për ndërtimin e një sistemi të ri, modern dhe të pajisur me teknologjinë më të avancuar.
Ndërkaq, Mullin deklaroi se nuk kishte asnjë dëshmi që ndërprerja të ishte shkaktuar nga një sulm kibernetik apo të kishte lidhje me problemet që Microsoft përjetoi një ditë më parë.
Ai gjithashtu siguroi se gjatë gjithë situatës nuk ishte rrezikuar jeta e askujt.
Ky është rasti i dytë i një ndalimi të tillë kombëtar të fluturimeve që nga sulmet terroriste të 11 shtatorit 2001, por njëkohësisht më i gjati.
Ndërkohë, përfaqësues nga të dyja kampet politike kanë kërkuar nisjen e një hetimi për të zbardhur plotësisht atë që ndodhi të premten në mbrëmje, me qëllim që një situatë e tillë të mos përsëritet më.
Sinjali – aty ku e vërteta flet para lajmit!
Burimi: Sinjali
