Prezantuesja e WPLG me qendër në Miami, Jacey Birch, postoi foto provokuese nga një festival muzikor në Orlando, menjëherë pasi shefi i saj i paralajmëroi punonjësit të mos postonin përmbajtje në stilin e influencuesve.

Fotot u bënë në festivalin e muzikës elektronike Electric Daisy Carnival, dhe në to ajo pozon me rroba që i zbulojnë anët e gjoksit. Birch është pjesë e WPLG që nga viti 2004. Gazetarët e FTVLive njoftuan se të paktën 10 gazetarë u dërguan atyre linqe për postimet e saj dhe se disa nga kolegët e tyre po pyesin veten pse menaxhmenti nuk reagoi.

Një burim në redaksinë e WPLG-së, emri i të cilit nuk është bërë i ditur, pohon se Birch është paralajmëruar tashmë për postimet në mediat sociale. Portali ua tregoi fotot edhe drejtorëve të programeve të lajmeve të stacioneve të tjera televizive. Të katër thanë se do të merrnin në konsideratë masa disiplinore, përfshirë shkarkimin.

Zëvendëspresidenti i Lajmeve i WPLG-së, Bill Pohovey, më parë u dërgoi një paralajmërim punonjësve që të mos publikonin përmbajtje që mund të dëmtonte reputacionin e tyre si gazetarë.

“Jam lodhur duke përsëritur veten, por ne nuk jemi ndikues, ne jemi gazetarë. Nuk duam video të stafit tonë duke kërcyer. Nuk duam sfilata mode, kombinime të ditës apo përmbajtje të tjera të pakuptimta që ulin reputacionin tuaj si gazetarë”, shkroi Pohovey, raporton New York Post .

Ai shtoi se të njëjtat rregulla vlejnë edhe për profilet private, sepse punonjësit përfaqësojnë televizionin edhe kur nuk janë në punë.

“Pavarësisht nëse punon apo jo, ti prapë përfaqëson median dhe duhet ta kujtosh gjithmonë rolin tënd si gazetar i besueshëm, jo si një Kardashian. Një pjesë e asaj që shoh është e pakëndshme për t’u parë”, shkroi ai.

Një nga stafi editorial i FTVLive akuzoi Pohovey-n se nuk i zbatonte rregullat e tij dhe e quajti atë një person pa shtyllë kurrizore.

Paralajmërimi më parë lidhej me prezantuesen e WPLG, Jenise Fernandez, e cila postoi foto me bikini nga pushimet në Fixhi. Pohovey i tha New York Post në atë kohë se ai nuk i ndalonte fotot e pushimeve apo fotot nga jeta e përditshme.

“Ne jetojmë në Florida dhe njerëzit veshin bikini në plazh. Ato foto ishin të përshtatshme dhe plotësisht në rregull”, tha ai.

Eksperti i komunikimit me bazë në Nju Jork, Amore Philip, beson se një foto nga një festival në një profil privat nuk është arsye për masa disiplinore, veçanërisht kur vetë drejtori deklaron se memorandumi nuk ndalon postimet nga jeta e përditshme.

“Rregullat e mediave sociale e mbrojnë një markë vetëm kur janë të shkruara qartë, të paraqitura paraprakisht dhe të zbatuara në mënyrë të barabartë për të gjithë. Nëse prezantuesit meshkuj postojnë foto nga ndeshjet ose daljet në mbrëmje pa pasoja, veçimi i një prezantueseje femër për fotot e festivalit krijon një standard të dyfishtë dhe ky është një rrezik më i madh për reputacionin e medias sesa vetë fotot”, thotë Philip.

New York Post kontaktoi Pohovey-n dhe Birch-in për koment, por ata ende nuk kanë dhënë përgjigje.