Eksperti i mjekësisë ligjore, Arsim Gërxhaliu, ka dëshmuar të premten në Gjykatën Themelore në Prishtinë për lëndimet që pësoi Maria Clara Urdangaray pasi ra nga kati i gjashtë i hotelit “Sonoma” në Fushë-Kosovë. Në të njëjtën seancë të rigjykimit ndaj Endrit Nikës, gjykata refuzoi propozimin e mbrojtjes për këqyrjen e vendit të ngjarjes.

Gërxhaliu tha se shtetasja argjentinase kishte pësuar politraumë, që nënkupton lëndime të shumëfishta. Sipas tij, asaj i ishte dhënë Trodon për shkak të dhimbjeve të forta, ndërsa ndërhyrjet për ta shpëtuar ishin evidentuar në raportin e autopsisë.
Gjatë pyetjeve për rënien, në seancë u përmend disa herë sipërfaqja e betonit ku kishte rënë Urdangaray. I pyetur nëse e kishte parë incizimin e momentit të rënies, Gërxhaliu tha se nuk e kishte parë.
Eksperti u pyet edhe nëse gjatë autopsisë ishin marrë mostra nga thonjtë e viktimës. Ai shpjegoi se marrja e këtyre mostrave i takon njësisë së forenzikës së Policisë dhe se gjatë autopsisë ekziston mundësia që ato të kontaminohen.
Në seancë u përmend se disa analiza toksikologjike ishin dërguar jashtë vendit. I pyetur nëse rezultatet tregonin konsumim të alkoolit apo të substancave narkotike, Gërxhaliu tha se nuk e dinte, pasi raporti toksikologjik nuk ishte hartuar prej tij.
Gjykata refuzon propozimet për këqyrjen e vendit dhe dëgjimin e pronarit të hotelit
Gjykata refuzoi propozimet e mbrojtjes për këqyrjen e vendit të ngjarjes dhe për dëgjimin e pronarit të hotelit “Sonoma”, Brahim Zeqiri. U refuzua edhe propozimi i prokurorit për të ftuar personin përgjegjës për kamerat e sigurisë. Gjatë diskutimit u ngrit çështja e ruajtjes me kohë të incizimeve.
Në fund të seancës, Nika kërkoi një USB dhe shprehu dëshirën për ta takuar nënën e tij. Zyrtarët e njësisë për sjelljen e të paraburgosurve i thanë se kërkesën për USB duhej ta paraqiste me shkrim.
Seancat e radhës u caktuan për 2 dhe 7 dhjetor 2026, të dyja në orën 13:15.
Çfarë thotë aktakuza
Sipas Prokurorisë Themelore në Prishtinë, ngjarja ndodhi më 1 gusht 2023. Prokuroria pretendon se Nika, pas një mosmarrëveshjeje me partneren e tij, e kishte goditur dhe kishte tentuar ta shkelte me veturë në parkingun e hotelit.
Sipas aktakuzës, përplasja kishte vazhduar në dhomën e hotelit, ku, pas goditjeve dhe shtyrjeve të pretenduara, ishte shkëputur korniza e dritares dhe Urdangaray kishte rënë nga kati i gjashtë. Ajo ndërroi jetë në Qendrën Klinike Universitare të Kosovës.
Gjykata Themelore në Prishtinë e kishte dënuar Nikën me 18 vjet burgim më 19 shkurt 2026. Gjykata e Apelit e anuloi aktgjykimin dhe e ktheu çështjen në rigjykim. Në seancën e parë të rigjykimit, Nika u deklarua i pafajshëm për akuzën për vrasje të rëndë.
Shënim: Personi i apostrofuar konsiderohet i pafajshëm derisa fajësia e tij të vërtetohet me vendim të formës së prerë të gjykatës.
Sinjali – aty ku e vërteta flet para lajmit!
Burimi: Sinjali





