Ish-kancelari gjerman, Gerhard Schroder, i cili së fundmi iu bashkua bordit mbikëqyrës të zinxhirit rus të supermarketeve Hyperglobus, vizitoi të mërkurën një prej dyqaneve të kompanisë në Moskë, ku u prit me duartrokitje nga punëtorët.

Pamjet e publikuara nga televizioni rus RBC tregojnë Schroderin duke hyrë në supermarket, ndërsa punonjësit e pritën me duartrokitje të gjata.

Ish-kancelari, i buzëqeshur, tha se ishte i kënaqur që ndodhej aty dhe që kishte mundësi të shihte supermarketin dhe rezultatet e punës së stafit.

Vizita vjen pak ditë pasi Schroder u emërua në bordin mbikëqyrës të Hyperglobus, kompanisë që menaxhon aktivitetin e rrjetit Globus në Rusi.

Operacionet ruse të Globus u shkëputën nga grupi gjerman Globus Holding vitin e kaluar, ndërsa supermarketet në Rusi vazhdojnë të përdorin markën Globus.

Schroder, i cili ishte kancelar i Gjermanisë nga viti 1998 deri më 2005, ka ruajtur prej vitesh lidhje të afërta me Rusinë dhe presidentin rus, Vladimir Putin. Pas largimit nga politika, ai ka punuar për disa kompani shtetërore ruse.

Marrëdhëniet e tij me Moskën kanë qenë objekt kritikash të vazhdueshme, veçanërisht në Gjermani, për shkak se ai ka vazhduar të mbajë lidhje me bizneset ruse edhe pas pushtimit të Ukrainës nga Rusia në vitin 2022 dhe vendosjes së sanksioneve perëndimore.

Në rolin e tij të ri, Schroder pritet të marrë pjesë në drejtimin e përgjithshëm të kompanisë dhe të kontribuojë në zhvillimin strategjik të biznesit të saj në tregun rus. /Telegrafi/