Garda Revolucionare e Iranit (IRGC) ka marrë përgjegjësinë për sulmin ndaj një cisterne nafte në Ngushticën e Hormuzit, duke paralajmëruar se anijet që, sipas saj, shkelin rrugët e përcaktuara të lundrimit do të ndiqen dhe ndëshkohen kudo në rajon.
Ndërkohë, agjencitë e sigurisë detare kanë raportuar edhe incidente të tjera ndaj anijeve tregtare në Gjirin Persik, duke shtuar shqetësimet për sigurinë e transportit detar në një nga korridoret më të rëndësishme energjetike në botë.
Marina e IRGC-së deklaroi se shënjestroi dhomën e motorit dhe sistemin e lëvizjes së cisternës MV Sun Shine, në pronësi të kompanisë Natwit, pasi anija tentoi të kalonte nëpër një rrugë që Irani e konsideron të paautorizuar. Sulmi shkaktoi zjarr në bord.
Në deklaratën e saj, Garda Revolucionare paralajmëroi se veprimet kundër anijeve që i konsideron shkelëse nuk do të kufizohen vetëm në Ngushticën e Hormuzit. Ajo kërcënoi gjithashtu se kompanitë që akuzohen për bashkëpunim me Shtetet e Bashkuara do të përballen me sanksione dhe se anijet e tyre do të shënjestrohen.
IRGC-ja fajësoi ushtrinë amerikane për përshkallëzimin e tensioneve në rajon, duke e akuzuar Uashingtonin për ndërhyrje në vendimet e kompanive të transportit detar dhe të sigurimeve.
Ndërkohë, udhëheqësi i faljes së së premtes në Teheran, Hoxhatoleslam Mohammad Javad Ali-Akbari, deklaroi se Ngushtica e Hormuzit do të mbetet e mbyllur derisa të plotësohen kushtet e Iranit.
Ai tha se Teherani ka paraqitur shtatë kushte dhe se do të vendosë për hapat e ardhshëm pasi ato të përmbushen. Sipas tij, gatishmëria ushtarake e Iranit është përmirësuar dhe strategjia e vendit ka kaluar nga mbrojtja në ofensivë.
Nga ana tjetër, Komanda Qendrore e Shteteve të Bashkuara (CENTCOM) njoftoi se kishte pastruar rrugët kryesore të lundrimit nga minat detare, duke deklaruar se korridoret janë të hapura për anijet që nuk shkelin sanksionet amerikane ndaj Iranit. Sipas CENTCOM-it, mijëra anije tregtare kanë kaluar në mënyrë të sigurt.
Megjithatë, raportimet për sulme ndaj anijeve tregtare vazhdojnë. Qendra Britanike për Operacionet e Tregtisë Detare (UKMTO) njoftoi se një anije që transportonte gaz të lëngshëm të naftës (LPG) ishte goditur nga predha të paidentifikuara rreth 13 milje detare në perëndim të Al-Jazira-s, në Emiratet e Bashkuara Arabe. Sulmi shkaktoi zjarr, i cili më vonë u vu nën kontroll.
Një ditë më parë, UKMTO kishte raportuar për një cisternë nafte në veri të ujërave të Katarit, e cila ishte goditur nga disa predha, duke shkaktuar viktima. Ndërkaq, një tjetër cisternë ishte përfshirë nga zjarri rreth 40 kilometra larg Fujairahut, në Gjirin e Omanit.
Sipas raportimeve mediatike, nga 28 shtatori deri më 5 tetor janë regjistruar të paktën 12 sulme, tentativa sulmesh ose incidente ngacmimi ndaj cisternave të naftës dhe anijeve që transportojnë gaz, shifra më e lartë javore që nga fillimi i luftës, më 28 shkurt.
Ngushtica e Hormuzit është një pikë strategjike për tregtinë globale të energjisë, pasi në kushte normale përmes saj kalon rreth një e pesta e dërgesave botërore të naftës dhe gazit. Megjithatë, transporti detar në këtë zonë është penguar rëndë që nga shpërthimi i luftës, për shkak të sulmeve iraniane ndaj anijeve tregtare dhe bllokadës amerikane ndaj porteve iraniane.
Pavarësisht tensioneve, të dhënat më të fundit tregojnë se eksportet e naftës nga vendet e tjera të rajonit, duke përjashtuar Iranin, janë rikthyer ditët e fundit në nivelet e para luftës.
Sinjali – aty ku e vërteta flet para lajmit!
The post Irani merr përgjegjësinë për sulmin ndaj cisternës së naftës, kërcënon anijet në Gjirin Persik appeared first on Sinjali.
Burimi: Sinjali
