Një grua në fshatin Zabel i Ulët të Drenasit ka denoncuar bashkëshortin e saj në Polici, pasi ka raportuar se prej tij kishte përjetuar dhunë të vazhdueshme psikologjike. Rasti ka përfunduar me ndalimin e burrit për 48 orë dhe lëshimin e një urdhri për mbrojtje të përkohshme emergjente, raporton Gazeta Sinjali.
Sipas informacioneve që ka siguruar Sinjali, ngjarja ka ndodhur mbrëmjen e së premtes, më 6 nëntor, rreth orës 21:00, në shtëpinë e çiftit.
Pas një mosmarrëveshjeje, 35-vjeçari I.C. ka fyer dhe ushtruar dhunë psikologjike ndaj bashkëshortes së tij, B.C. 36 vjeçare, sipas deklarimit të kësaj të fundit në Polici.
Gruaja e ka raportuar rastin rreth orës 23:00, ndërsa Policia ka intervistuar edhe bashkëshortin e saj në prani të avokatit mbrojtës.
Burimet e Sinjalit bëjnë të ditur se nga ky incident nuk janë raportuar persona të lënduar.
Pas konsultimit me Prokurorinë, është marrë vendim që i dyshuari të ndalohet për 48 orë, ndërsa gruaja është vendosur te familjarët e saj.
Ndaj të dyshuarit është lëshuar edhe urdhër për mbrojtje të përkohshme emergjente.
Sinjali – aty ku e vërteta flet para lajmit!
Burimi: Sinjali
