Sinjali ka siguruar informacione të reja lidhur me armën që dyshohet se u përdor në vrasjen e rëndë në Suharekë, për të cilën është arrestuar 60-vjeçari Rrahman Hoti.

Sinjali mëson ekskluzivisht se pistoleta e llojit Sig Sauer, e cila iu gjet dhe u sekuestrua të dyshuarit gjatë arrestimit, ishte e pajisur me leje nga Ministria e Punëve të Brendshme (MPB).
60-vjeçari dyshohet se këtë armë e përdori për të shtënë disa herë në drejtim të viktimës, pas një konflikti të dyshuar rreth një parkingu në Suharekë.
Ndërkohë, Sinjali mëson se Rrahman Hoti ka edhe një të kaluar kriminale në Zvicër, ku kishte kryer vrasjen e bashkëshortes së tij dhe për këtë vepër kishte vuajtur disa vite burg, para se të dëbohej nga shteti zviceran.
Pas ngjarjes në Suharekë, Hoti ishte larguar nga vendi i krimit, por u arrestua pas ndjekjes nga zyrtarët policorë në afërsi të fshatit Samadraxhë.
Rasti po hetohet nga organet kompetente.
Shënim: Personat e përmendur në këtë lajm konsiderohen të pafajshëm derisa fajësia e tyre të vërtetohet me vendim të formës së prerë të gjykatës.
Sinjali – aty ku e vërteta flet para lajmit!
Burimi: Sinjali





