Çmimi i naftës Brent ka rënë drejt 103 dollarëve për fuçi të premten, duke zbutur fitimet e një dite më parë, pas deklaratave të presidentit amerikan, Donald Trump, se Shtetet e Bashkuara janë të përfshira në bisedime produktive me Iranin.
Trump ka deklaruar në rrjetet sociale se SHBA-ja do të përmbahet nga sulmet ndaj Iranit deri pas zgjedhjeve afatmesme. Ai ka pretenduar gjithashtu se sasi rekord të naftës bruto po kalojnë përmes Ngushticës së Hormuzit. Megjithatë, ka theksuar se bllokada detare amerikane ndaj porteve iraniane do të mbetet plotësisht në fuqi.
Ndërkohë, raportime të mëvonshme kanë bërë të ditur se SHBA-ja kishte përgatitur plane për sulme treditore ndaj Iranit, me objektiva që përfshijnë rezervat e dronëve dhe raketave, infrastrukturën energjetike dhe lokacione të tjera.
Të enjten, çmimi i naftës Brent u rrit deri në 5.7 për qind, pasi Teherani intensifikoi sulmet ndaj cisternave që lundrojnë në Ngushticën e Hormuzit. Sipas raportimeve, gjatë javës së fundit janë shënjestruar nëntë anije.
Ngushtica e Hormuzit është një nga korridoret më të rëndësishme detare për transportin global të naftës. Çdo përshkallëzim i konfliktit në këtë zonë mund të ndikojë në furnizimin me energji dhe të rrisë pasigurinë në tregjet ndërkombëtare.
Sinjali – aty ku e vërteta flet para lajmit!
The post Deklaratat e Trump për Iranin ulin çmimin e naftës në tregjet ndërkombëtare appeared first on Sinjali.
Burimi: Sinjali
