Kryeministri në detyrë i Kosovës, Albin Kurti, ka pritur në takim zëvendësndihmëssekretarin e përgjithshëm për Partneritete në NATO, ambasadorin Kevin Hamilton, i cili po qëndron për herë të parë për vizitë në Kosovë.
Sipas njoftimit, gjatë takimit është diskutuar për thellimin e bashkëpunimit ndërmjet Kosovës dhe NATO-s, si dhe për zhvillimet aktuale në vend dhe rajon.
Kurti ka folur për zhvillimet në fushën e teknologjisë dhe mbrojtjes, duke përfshirë edhe prodhimin e municionit në Kosovë.
Po ashtu, në takim është biseduar për sigurinë në Kosovë dhe rajon, marrëdhëniet me NATO-n dhe zhvillimet politike aktuale.
Një nga temat e diskutimit ishte edhe themelimi i xhandarmërisë së Kosovës. Në pyetjen e ambasadorit Hamilton, Kurti ka shpjeguar konceptin e kësaj strukture, duke theksuar nevojën për forcimin e sigurisë dhe koordinimit me KFOR dhe NATO-n./ Zëri
