Kryeministri në detyrë i Kosovës, Albin Kurti, ka deklaruar në një tubim me qytetarët e Lipjan se numri i subjektit të tij në zgjedhjet e 7 qershorit do të mbetet 116, i njëjti që kishte edhe në zgjedhjet e 28 dhjetorit të vitit të kaluar.
Kurti u shpreh i bindur se rezultati elektoral kësaj radhe do të jetë dukshëm më i lartë, duke thënë se nga 51.1 për qind sa ishte mbështetja në dimër, tani synimi është të arrihen 60 për qind ose edhe më shumë.
Para qytetarëve të Lipjanit, ai foli edhe për disa nga vendimet që, sipas tij, janë ndërmarrë në javët e para të Qeverisë Kurti 3.
Sipas Kurtit, është miratuar ligji për vendosjen e çmimeve tavan për produktet bazë, ndërsa është votuar edhe paga e 13-të për punëtorët e sektorit publik që paguhen nga buxheti i shtetit.
Ai shtoi gjithashtu se është miratuar edhe buxheti prej 4 miliardë eurosh, duke e cilësuar atë si pjesë të angazhimit të qeverisë për mbështetje ekonomike dhe sociale për qytetarët.
