Një ish-zëvendësministër polak, i kërkuar me akuza për keqpërdorim të fondeve publike, dyshohet se mund të jetë larguar nga Hungaria përmes Serbisë, ka deklaruar kryeministri hungarez, Péter Magyar, në një intervistë për televizionin polak TVN24.
Magyar ndodhet në Poloni për një vizitë dyditore, e para jashtë vendit pas marrjes së postit të kryeministrit.
Ish-ministri polak i Drejtësisë, Zbigniew Ziobro, dhe zëvendësi i tij, Marcin Romanowski, për të cilët prokurorët thonë se keqpërdorën para nga një fond i krijuar për të ndihmuar viktimat e krimit duke shënjestruar kundërshtarët politikë me spiunazh, kishin marrë azil në Hungari nga paraardhësi i Magyarit, Viktor Orban.
Ziobro ndodhet në Shtetet e Bashkuara, ku sipas burimeve të Reuters, zëvendëssekretari i Shtetit i SHBA-së, Christopher Landau, ka udhëzuar zyrtarë të lartë të Departamentit të Shtetit që të lehtësonin dhe miratonin një vizë për të.
Megjithatë, vendndodhja e Romanowskit mbetet e paqartë.
“Nga sa kam kuptuar Ziobro është larguar përmes Zonës Shengen rreth një ditë para inaugurimit tim”, ka deklaruar Magyar.
“Sapo fola me kolegët e mi dhe… ka shenja se edhe z. Romanowski u largua përmes Serbisë, por ky informacion nuk është konfirmuar ende.”
Ministria e Jashtme serbe nuk është deklaruar për këtë çështje.
Gjatë ditës, Magyar do të takohet me kryeministrin polak Donald Tusk dhe presidentin Karol Nawrocki në Varshavë. Magyar dhe Tusk më pas do të udhëtojnë në qytetin portual të Gdanskut, ku do të takohen me ish-presidentin dhe laureatin e Çmimit Nobel për Paqe, Lech Wałęsa.
Varshava planifikon t’i ofrojë Budapestit qasje në gazin e lëngshëm amerikan përmes një terminali të ri në Gdansk, i cili pritet të fillojë operimin në vitin 2028. Rafineria polake Orlen tashmë i shet Ukrainës gazin amerikan.
The post Kryeministri hungarez: Ish-zëvendësministri i kërkuar nga Varshava mund të jetë larguar nëpërmjet Serbisë appeared first on Gazeta Express.
