Frashër Krasniqi, kandidat për deputet nga PSD-ja ka deklaruar se zgjedhjet e ardhshme do të përcaktojnë jo vetëm pushtetin, por edhe ekzistimin e një opozite të mirëfilltë në Kosovë.
Sipas Krasniqit, shumica e partive politike po synojnë vetëm rritjen e pushtetit të tyre, ndërsa PSD-ja, siç tha ai, synon të ndërtojë opozitë reale në vend.
“Këto zgjedhje janë për dy kategori të partive. Një kategori janë partitë që po duan më shumë pushtet prej këtyre zgjedhjeve dhe një kategori ku është vetëm PSD-ja, partia që po do me ndërtu opozitë në këtë vend. Sepse, po dihet se si do të jetë pushteti i ardhshëm. Është e qartë, radhitja ka shumë gjasa të vogla me ndërrua, vijat e kuqe janë largua nga të gjithë dhe rrjedhimisht i bie që Albin Kurtin kemi me pas sërish kryeministër”, deklaroi ai në emisionin “Këndi i Debatit” në Tëvë1.
Ai u shpreh se rezultati i zgjedhjeve pritet të mos sjellë ndryshime të mëdha në raportet politike, duke vlerësuar se Albin Kurti ka gjasa të mbetet sërish kryeministër.
Krasniqi kritikoi edhe partitë opozitare për heqjen e “vijave të kuqe”. Sipas tij, nëse vazhdon kjo qasje, Kosova rrezikon të mbetet pa opozitë funksionale, ndërsa opozita e deritanishme, sipas Krasniqit, nuk ka qenë e organizuar dhe parimore.
“Nëse krejt partitë opozitare i kanë heq vijat e kuqe edhe në rastin kur Albin Kurti bie në 30% edhe pse gjasat janë shumë të vogla, i bie që partitë pa vija të kuqe i shkojnë Kurtit cilado prej tyre, prapë Albin Kurti do të jetë kryeministër. Në këtë kontekst i bie që Kosova rrezikon të mbes pa opozitë, sepse nëse e shohim se çfarë opozite kemi pasur në këto pesë vitet e fundit dhe nëse i shohim këto ribashkimet jo parimore kuptohet që s’ka opozitë”, tha ai.
